पोखरा । रक्तिम सांस्कृतिक अभियान गण्डकी प्रदेशको भेला सम्पन्न भएको छ । शनिबार सम्पन्न भेलाले भक्त ऊँचै (नवलपुर) को अध्यक्षतामा ७ सदस्यीय रक्तिम प्रदेश समिति गठन गरेको छ ।
समितिको उपाध्यक्षमा सबिन अर्गेजा (बाग्लुङ) सचिव बिमल पाण्डे (कास्की) सह सचिव कृष्ण गिरी (नवलपुर), कोषाध्यक्ष कमल राना (कास्की) र सदस्यहरुमा सुरन परियार (तनहुँ) र योगेश बीसी (म्याग्दी) रहनुभएको छ ।
रक्तिम सांस्कृतिक अभियानका केन्द्रीय सचिव हेमराज आश्रमले उद्घाटन गर्नुभएको भेलालाई गण्डकी प्रदेश सभाका सदस्यद्वय खिमविक्रम शाही र पियारी थापा, राष्ट्रिय जनमोर्चाका पूर्व सचिव कृष्ण अधिकारी र राजमो गण्डकीका अध्यक्ष शंकर बरालले शुभकामना दिनुभएको थियो । कार्यक्रमममा राजमो कास्कीका अध्यक्ष रवीमोहन ढकाल, विद्यार्थी नेता गणेश अधिकारी, युवक संघका विक्रम थापालगायतका नेताहरुको आतिथ्यता रहेको थियो ।
राष्ट्रियता र जनतन्त्रका लागि प्रगतिशील चेतनाको अभियान सञ्चालन गरिरहेको रक्तिम सांस्कृतिक अभियानले संगठन निर्माणमासमेत जोड दिएको छ । रक्तिमले सातै प्रदेशमा भेला गर्ने कार्यतालिका तय गरे बमोजिम गण्डकीको भेला सम्पन्न गरेको हो ।
