काठमाडौ । सरकारले पेट्रोलियम पदार्थको मूल्य घटाएको छ । सत्ता गठबन्धनको निर्णयअनुसार नेपाल आयल निगमले पेट्रोलियम पदार्थको मूल्यमा कटौति गरेको जानकारी दिएको हो ।
२०७९ असार ११ गते शनिबार बसेको निगम सञ्चालक समिति बैठकले मूल्य घटाउने निर्णय गरेको हो । निगमले पेट्रोलमा २० रुपियाँ र डिजेल–मट्टितेलमा २८ रुपियाँ मूल्य घटाएको छ ।
यसानुसार अब पेट्रोलको मूल्य १७९ रुपियाँ निर्धारण हुने छ भने डिजेल–मट्टितेलको १६३ रुपियाँ कायम हुने छ । घटेको मूल्य शनिबार राति १२ बजेदेखि लागु हुने आयल निगमले जनाएको छ ।
सरकारले घटाएको डिजेल र पेट्रोलको नयाँ मूल्य शनिबार मध्यरातिदेखि लागु हुने भएको छ । सरकारले पेट्रोलको २० र डिजेलको २८ रुपियाँ मूल्य घटाउने घोषणा गरेकामा सो निर्णय मध्यराति १२ बजेदेखि लागु हुने शनिबार आयोजित आकस्मिक पत्रकार सम्मेलनमा उद्योग वाणिज्य तथा आपूर्ति मन्त्री दिलेन्द्रप्रसाद बडूले जानकारी दिए ।
उनका अनुसार सरकारको निर्णयसँगै पेट्रोलको मूल्य १७९ रुपियाँ कायम हुने भएको छ । हाल पेट्रोलको मूल्य १९९ रुपियाँ रहेकामा अब १७९ रुपियाँमा पेट्रोल पाइने भएको हो ।
यस्तै डिजेलको मूल्य हाल १९२ रुपियाँ रहेकामा अब २८ रुपियाँ घटेर १६४ रुपियाँ कायम गरिएको छ । सरकारले पेट्रोलियम पदार्थमा लागु गर्दै आएको कर कटौती गरेर सर्वसाधारणलाई राहत दिएको हो ।
