काठमाडौं । नेपाल आयल निगमले पेट्रोलियम पदार्थको मूल्यवृद्धि गरेसँगै व्यवसायीले आफूखुशी यातायातको भाडा बढाएका छन् । पृथ्वीराज मार्ग बस सञ्चालक समितिले आजैदेखि लागू हुनेगरी भाडा बढाएको हो ।
सञ्चालक समितिले सोमबारदेखि लागू हुने गरी १५ प्रतिशत भाडा वृद्धि गरेको हो ।
पेट्रोलियम पदार्थको मूल्य वृद्धिभए लगत्तै यातायात व्यवस्था विभागले भाडा समायोजन गर्नुपर्ने भएपनि व्यवसायीहरुले आफूखुशी भाडा बढाएका हुन् ।
आजदेखि पृथ्वीराजमा कम्पनीबाट चल्ने सबै यातायातका साधनमा भाडा बढेको छ । यसअघि पनि कम्पनीले आफूखुशी भाडा बढाएको थियो ।
आयाल निगमले आइतबार राति १२ बजेदेखि लागू हुने गरी पेट्रोलियम पदार्थको मूल्यमा भारी वृद्धि गरेको छ । निगमले पेट्रोलको मूल्य लिटरमै २१ रुपैयाँले वृद्धि गरेको हो ।
उक्त दरले बढेसँगै सर्वसाधारण जनताले अब पेट्रोल लिटरको १ सय ९९ रुपैयाँ तिर्नुपर्ने भएको हो। पेट्रोलसँगै अब डिजेल र मट्टीतेलको खुद्रा बिक्री मूल्य २७ रुपैयाँ प्रतिलिटरले बढेर १९२ रुपैयाँ पुगेको छ।
निगमका अनुसार हवाइ इन्धन (आन्तरिक) तर्फ १९ रुपैयाँ लिटरमा बढ्दा १८५ रुपैयाँ, हवाइ इन्धन (बाह्य) तर्फ अमेरिकी डलर सयले वृद्धि हुँदा प्रतिकिलोलिटर अमेरिकी डलर एक हजार छ सय ४५ कायम भएको छ।
एलपी ग्यासको मूल्य भने हाललाई पूर्ववत् कायम राखिएको निगमले जनाएको छ।
