काठमाडौँ । अर्थमन्त्री जनार्दन शर्मासँग विश्व बैङ्कका प्रबन्ध निर्देशक मारी अल्का पान्जेस्तुले २०७९ असार ५ गते भेटवार्ता गर्नुभएको छ ।
अर्थ मन्त्रालयमा भएको भेटमा मन्त्री शर्माले विश्व बैङ्कसँग लामो समयदेखि रहिआएको सम्बन्ध र विकास साझेदारीको स्मरण गर्दै सहयोगको प्रशंसा गर्नुभयो । ‘नेपालको विकास प्रयासमा विश्व बैङ्क लामो समयदेखि एउटा भरपर्दो साझेदार संस्थाका रूपमा रहिआएको छ’ भेटमा उहाँले भन्नुभयो ।
विश्व बैङ्कले कोभिड–१९ पछिको परिस्थितिसँग जुध्न प्रदान गरेको १२२ मिलियन अमेरिकी डलर बराबरको वित्तीय सहयोगका लागि मन्त्री शर्माले धन्यवाद दिनुभएको थियो । पछिल्लो समय नेपालका लागि विश्व बैङ्कको वित्तीय सहयोग उल्लेखनीय रूपमा बढ्दै गएको छ ।
सन् १९६९ मा १६.९ लाख अमेरिकी डलरको वित्तीय सहयोगबाट नेपालसँग विश्व बैङ्कको सहकार्य सुरु भएको थियो । विश्व बैङ्कसँग हालसम्म तीन अर्ब अमेरिकी डलर बराबरको २५ आयोजनामा सहकार्य भएको छ । केही महत्त्वपूर्ण आयोजना सम्झौताको चरणमा रहेको र हाल सञ्चालित आयोजना निकै महत्त्वपूर्ण र दूरगामी प्रकृतिको रहेको मन्त्री शर्माले बताउनुभयो ।
‘विश्व बैङ्कसँगको वित्तीय सहकार्यमा सञ्चालित आयोजना समयमै सम्पन्न गरी सोको लाभ जनतालाई हस्तान्तरण गर्न हामी सबैको प्रयास रहनेछ’ मन्त्री शर्माले भन्नुभयो ।
सो अवसरमाा विश्व बैङ्कको प्रबन्ध निर्देशक मारी अल्का पान्जेस्तुले बजेट समावेशी र सबै क्षेत्रलाई समेट्ने गरी आएकामा खुसी लागेको बताउनुभयो । उहाँले नेपालको विकास साझेदारका रूपमा सहभागी हुन पाउँदा खुसी लागेको बताउँदै आगामी दिनमा पनि वित्तीय सहयोगमार्फत् नेपालको समग्र विकास प्रणालीमा सघाउ पु¥याउने जानकारी गराउनुभएको थियो । (रासस)
