काठमाडौँ । यौनिक तथा लैङ्गिक अल्पसङ्ख्यक समुदायका संविधानप्रदत्त हक संरक्षण गर्न हर्माेनल क्लिनिक सेवा खुल्ने भएको छ ।
यौन तथा प्रजनन स्वास्थ्य सेवाका क्षेत्रमा क्रियाशील संस्था नेपाल परिवार नियोजन सङ्घले नेपालमा पहिलोपटक आगामी साउनदेखि निःशुल्क सो सेवा सुरुआत गर्न लागेको हो ।
दक्षिण एसियामा गैरसरकारी संस्थाबाट हर्माेनल क्लिनिक सञ्चालन गर्ने सङ्घ पहिलो संस्था हुने बताइएको छ । यौनिक तथा लैङगिक अल्पसङ्ख्यक भन्नाले समलिङ्गी महिला, समलिङ्गी पुरुष, द्विलिङ्गी, पारालिङ्गी, अन्तर्लिङ्गी र क्वेयर आदि पर्दछन् ।
सङ्घका व्यवस्थापक डा नरेशप्रताप केसीले विशेषगरी यौनिक तथा लैङगिक अल्पसङ्ख्यक समुदायका लागि हर्माेनल क्लिनिक सेवा सञ्चालनका लागि अन्तिम तयारी भइरहेको र आगामी साउनदेखि सेवा सुरुआत हुने जानकारी दिनुभयो ।
अन्तर्राष्ट्रिय परिवार नियोजन महासङ्घको आर्थिक एवम् प्राविधिक सहयोगमा सञ्चालन हुने सो क्लिनिकल सेवाभित्र के कस्ता सेवालाई समावेश गर्नेे भन्ने आन्तरिक तयारी तथा आवश्यक जनशक्ति तथा उपकरणको व्यवस्थापन भइरहेको सङ्घले जनाएको छ ।
उहाँले भन्नुभयो– ‘यसबाट विशेषगरी हर्मोन चेन्ज गर्नेका लागि सहयोग पुग्छ । पुरुषलाई महिला, महिलालाई पुरुष जस्तो लाग्छ सक्छ, वास्तवमा के हो ? पुरुषलाई महिला र महिलालाई पुरुष बन्ने चाहना भएमा सोहीअनुसारको हार्माेन परिवर्तनको क्लिनिकमा हुन्छ ।’
सङ्घले कोभिड–१९ महामारी तथा विगत वर्षका प्राकृतिक बिपत्का अवस्थामा यौन तथा प्रजनन स्वास्थ्यसम्बन्धी सेवा निरन्तर जारी राखेको थियो । नेपाल सरकारद्वारा सञ्चालित परिवार नियोजन (व्यवस्थापन) सेवामा सङ्घको योगदान २० प्रतिशतभन्दा माथि रहेको छ ।
