काठमाडौं । १३ औं दक्षिण एसियाली खेलकुद (साग) अन्तर्गत उसुमा नेपालकी निमा घर्ति मगरले स्वर्ण जितेकी छिन् । यो सागको पाँचौं दिन बिहीबार नेपालले जितेको पहिलो स्वर्ण समेत हो ।
लगनखेलस्थित आर्मीको कभर्डहलमा थाउलोको महिला नान्दोमा कुल १८.९१ अंक जोडेर निमाले स्वर्ण जितेकी हुन् ।
यसअघि २०१६ मा भएको १२औं सागमा पनि निमाले स्वर्ण जितेकी थिइन् । यस स्पर्धामा बंगलादेशले रजत र श्रीलंकाले कास्य जितेको छ।
सागमा आज (बिहीबार) १९ स्वर्णको छिनोफानो हुनेछ । १७ खेलमार्फत् आज १९ वटा स्वर्ण पदकको टुंगो लाग्दैछ। अहिलेसम्मको पदक तालिकाअनुसार भारत शीर्ष स्थानमा छ।
अहिलेसम्म नेपालले ३० स्वर्ण, १५ रजत र २५ कास्य पदक जितेको छ । ३४ स्वर्ण जित्दै भारतले ४ स्वर्ण पदकले नेपाललाई उछिनेको छ।
अहिलेसम्मको पदक तालिकाअनुसार ३४ स्वर्ण, २३ रजत र १३ कास्यसहित भारत पहिलो, ३० स्वर्ण, १५ रजत र २५ कास्यसहित नेपाल दोस्रो, नौ स्वर्ण, १८ रजत र १८ कास्यसहित पाकिस्तान तेस्रो, ८ स्वर्ण, २३ रजत र ३९ कास्यसहित श्रीलंका चौथो, ४ स्वर्ण, ८ रजत र २६ कास्यसहित वंगलादेश पाँचौँ, १ स्वर्ण र २ कास्यसहित माल्दिभ्स छैटौँ र ४ कास्यसहित भुटान सातौँ स्थानमा छ ।
