काठमाडौं । सरकारले १८ वर्ष माथिका सबै नागरिकलाई कोरोनाविरुद्धको बुस्टर डोज लगाउने भएको छ ।स्वास्थ्य तथा जनसंख्या मन्त्रालयले बिहीबार सो निर्णय गरी स्वास्थ्य कार्यालयहरुलाई परिपत्र गरेको छ ।
मन्त्रालय अन्तर्गतको स्वास्थ्य सेवा विभाग परिवार कल्याण महाशाखाले बिहीबार ७७ वटै स्वास्थ्य कार्यालयलाई परिपत्र गरी १८ वर्षभन्दा माथिका सबै व्यक्तिलाई खोप लगाउन निर्देशन दिएको छ । उपलब्धताको आधारमा कोभिशिल्ड, एस्ट्राजेनिका, मोडर्ना वा फाइजर खोप प्रदान गर्न परिपत्रमा भनिएको छ ।
बुस्टर खोप प्रदान गर्दा स्वास्थ्यकर्मीलगायत अग्रपंक्तिमा खटिने व्यक्ति, ६० वर्ष वा सो भन्दा माथिका ज्येष्ठ नागरिक, दीर्घरोगी, गर्भवती महिला र सामाजिक जनसांख्यिक रुपमा पिछडिएका वर्गका व्यक्तिहरुलाई प्राथमिकता दिन निर्देशन दिइएको छ ।
यसअघि अग्रपंक्तिमा खटिएका व्यक्तिहरुलाई मात्र कोरोना संक्रमणविरुद्ध बुस्टर डोज प्रदान गरिएको थियो ।
कोभिड–१९ बाट संक्रमण भएका व्यक्तिलाई संक्रमणमुक्त भएको १ महिनापछि खोप प्रदान गर्न र बुस्टर मात्राको लागि पनि सोही लागू गर्न भनिएको छ ।
