काठमाडौं । राष्ट्रिय जनमोर्चाको तर्फबाट राष्ट्रिय सभामा उम्मेदवारी दिएका तुलबहादुर विश्वकर्मा (राजेश विक) राष्ट्रिय सभामा निर्वाचित हुने करिब निश्चित भएको छ । राजेश विक विजयी भएमा राजमोका लागि पहिलो पटक राष्ट्रिय सभाको ढोका खुल्नेछ ।
आगामी माघ १२ गते हुने राष्ट्रिय सभा निर्वाचनका लागि पाँच दलीय गठबन्धनका तर्फबाट विक लुम्बिनी प्रदेश अन्तर्गत दलित कोटाबाट उम्मेदवार हुनुहुन्छ । उहाँको प्रतिस्पर्धीका रुपमा नेकपा (एमाले) का कृष्णबहादुर विकले उम्मेदवारी दिनुभएको छ ।
लुम्बिनी प्रदेशमा गठबन्धन र एमालेबीचको प्रतिस्पर्धामा गठबन्धन ९ सय ४६ मतका साथ अगाडि छ । यदी निर्वाचन हुने दिनसम्म गठबन्धनको अवस्था यथावत नै रहेमा राजेश विकको जित सुनिश्चित हुनेछ भने राजमो राष्ट्रिय सभामा प्रवेश गर्ने छ ।
राष्ट्रिय सभामा प्रदेश सभाका सांसद र स्थानीय तहका प्रमुख तथा उपप्रमुखहरुले मतदान गर्नेछन् । उनीहरुको मतभार पनि फरक हुन्छ ।
लुम्बिनी प्रदेशमा प्रदेश सभाका ८१ जना सदस्यहरु मतदाताको रुपमा रहनेछन् । एकजना प्रदेश सभा सांसदको मतभार ४८ छ।
यहाँ गठबन्धनमा सामेल नेपाली कांग्रेसका १९, माओवादी केन्द्रका १९, जनता समाजवादीका ४, राष्ट्रिय जनमोर्चाका १ र एकीकृत समाजवादीका १ सांसद छन् । यसबाट प्रदेश सभामा गठबन्धनको मतभार २ हजार १ सय १२ हुने देखिन्छ। यस्तै, प्रदेश सभामा एमालेका ३६ जना सदस्य रहेकाले त्यहाँ उसको मतभार १ हजार ७ सय २८ छ।
राष्ट्रिय सभा निर्वाचनमा स्थानीय तहका प्रमुख–उपप्रमुखको मतभार १८ हुन्छ । लुम्बिनी प्रदेशमा गठबन्धनमा रहेका नेपाली कांग्रेसका ६३, माओवादी केन्द्रका ३६, जसपाका १३, राजमोका ५, एकीकृत समाजवादीका ४ (एक जना नेपाली कांग्रेसमा प्रवेश) गरी १ सय २१ जना प्रमुख–उपप्रमुख छन्। यो संख्या भनेको २ हजार १ सय ४६ मतभार हो। लुम्बिनी प्रदेशमा स्थानीय तहमा एमालेका ८८ जना प्रमुख–उपप्रमुख छन् । यो संख्या भनेको १ हजार ५ सय ८४ मतभार हो ।
प्रदेश सभा र स्थानीय तहका सबै मतदाताको मतभार हिसाब गर्दा गठबन्धनको पक्षमा ४ हजार ३ सय ८ र एमालेको ३ हजार ३ सय १२ मत प्राप्त देखिन्छ। यसले गर्दा एमालेका कृष्णबहादुर विक भन्दा राजमोका उम्मेदवार राजेश विक ९ सय ४६ मतले अगाडि देखिनुभएको छ ।
६० सदस्यीय राष्ट्रिय सभामा ५७ जना सदस्य प्रदेश सभा र स्थानीय तहका निर्वाचित जनप्रतिनिधिबाट निर्वाचित हुन्छन् भने ३ जना मन्त्रिपरिषदको सिफारिसमा राष्ट्रपतिबाट मनोनित हुने व्यवस्था छ । आगामी माघ १२ गते रिक्त १९ सिटका लागि निर्वाचन हुन लागेको हो ।
