काठमाडौँ । प्रगतिशील लेखक सङ्घ, नेपालको बाह्रौँ राष्ट्रिय सम्मेलन आगामी चैत २५ र २६ गते काठमाडौँमा हुने भएको छ ।
२०७८ पुस १६ र १७ गते काठमाडौँमा सम्पन्न केन्द्रीय समिति र तेस्रो राष्ट्रिय परिषद् बैठकले सो निर्णय गरेको हो ।
अध्यक्ष प्रा.डा. जीवेन्द्र देव गिरी र महासचिव समीर सिंहको हस्ताक्षरमा पुस १७ गते जारी प्रेसविज्ञप्तिमा सो जानकारी दिइएको छ ।
सम्मेलन सफल पार्नका लागि अध्यक्ष गिरीको अध्यक्षतामा सम्मेलन आयोजक समिति तथा विभिन्न उपसमिति गठन भएको जानकारी दिइएको विज्ञप्तिमा अन्य प्रगतिशील घटकलाई सामेल गर्न वार्ता समिति गठन गरिएको, मुखपत्र प्रलेस प्रकाशन तथा इतिहाससम्बन्धी सामग्री प्रकाशनका लागि बेग्लाबेग्लै सम्पादक मण्डल गठन गरिएको, प्रलेस प्रतिभा पुरस्कार र प्रलेस युवा पुरस्कारका लागि थप रकम प्रदान गरिएबापत आनन्देव भट्टकी जीवन सँगिनी र प्रा.डा. जीवेन्द्र देव गिरीप्रति धन्यवाद ज्ञापन गरिएको छ ।
प्रेसविज्ञप्तिको पूर्ण पाठ यस्तो छ–
“प्रगतिशील लेखक सङ्घ, नेपालको केन्द्रीय समिति तथा तेस्रो राष्ट्रिय परिषद् बैठक पुस १६ र १७ गरी दुई दिनसम्म काठमाडौँमा सम्पन्न भयो । सङ्घका अध्यक्ष प्रा.डा. जीवेन्द्र देव गिरीको अध्यक्षतामा सम्पन्न बैठकले गरेका निर्णयहरू जानकारी गराउन यो विज्ञप्ति जारी गरिएको छ ।
१. प्रगतिशील लेखक सङ्घको बाह्रौँै राष्ट्रिय सम्मेलन चैत २५ र २६ गते काठमाडौँमा गर्ने निर्णय भएको छ । सम्मेलनलाई व्यवस्थित गर्न प्रा.डा. जीवेन्द्र देव गिरीको अध्यक्षता सम्मेलन आयोजक समिति गठन गरिनुका साथै व्यवस्थापन उपसमिति, प्रकाशन उपसमिति, स्रष्टा सम्मान उपसमिति, प्रतिवेदन मस्यौदा उपसमिति, विधान मस्यौदा उपसमिति, प्रचार प्रसार उपसमिति, स्वयंसेवक परिचालन उपसमिति र अतिथि सत्कार उपसमिति गठन गर्ने निर्णय गरिएको छ । यसका साथै २०७८ फागुन महिनाभरि जिल्ला सम्मेलन र चैत्रको पहिलो हप्तासम्म प्रदेश सम्मेलन गर्ने निर्णयसमेत गरिएको छ ।
२. प्रलेस राष्ट्रिय सम्मेलन तयारीका सन्दर्भमा अन्य प्रगतिशील घटकहरूलाई पनि समावेश गर्न अध्यक्ष प्रा.डा. जीवेन्द्र देव गिरीको संयोजकत्वमा वार्ता समिति गठन गरिएको छ, जसका सदस्यहरूमा समीर सिंह, आरसी न्यौपाने, मातृका पोखरेल र शालिकराम तिमिल्सिना हुनुहुन्छ ।
३. मगर, लिम्बु, मैथिली र गुरुङ भाषाको प्रगतिशील साहित्यको इतिहासका साथै नेपाली प्रगतिशील नाटक तथा बालसाहित्यको इतिहास विषयमा व्रmमशः लोकबहादुर थापामगर, विजय सुब्बा, रोशन जनकपुरी, रत्नबहादुर गुरुङ, प्रा.डा. कपिल लामिछाने र विनय कसजूले तयार गर्नुभएका सामग्री पनि बाह्रौँ राष्ट्रिय सम्मेलनअगि नै प्रकाशन गर्ने निर्णय भएको छ । सो कार्य सम्पन्न गर्न प्रा.डा. जीवेन्द्र देव गिरी प्रधान सम्पादक रहेको एक सम्पादक मण्डल गठन गरिएको छ ।
४. बाह्रौँ राष्ट्रिय सम्मेलनको सिलसिलामा नै सातै प्रदेशको इतिहाससहित ‘प्रलेस’ को सम्मेलन विशेषाङ्क प्रकाशन गर्ने निर्णय भएको छ, जसका निम्ति गोपीरमण उपाध्यायको प्रधान सम्पादकत्वमा एक सम्पादक मण्डल गठन गरिएको छ ।
५. प्रलेस प्रतिभा पुरस्कारको अक्षयकोषमा वृद्धि गर्न आनन्द देव भट्टकी जीवन सँगिनीले थप रु. २ लाख प्रदान गर्नुभएकोमा बैठकले धन्यवाद ज्ञापन गरेको छ । यसरी नै प्रलेस युवा प्रतिभा पुरस्कार स्थापनाका लागि अक्षयकोष स्थापनार्थ प्रा.डा. जीवेन्द्र देव गिरीले रु. १ लाख प्रदान गर्नुभएकोमा पनि बैठकले धन्यवाद ज्ञापन गरेको छ ।
६. देशीविदेशी शक्तिहरू गणतन्त्र तथा धर्म निरपेक्षतालाई नै समाप्त पार्ने दिशामा अग्रसर भइरहेको सन्दर्भमा त्यस प्रकारका प्रतिगामी सोचाइका विरुद्ध गणतन्त्र तथा धर्म निरपेक्षतालाई संस्थागत गर्नेतर्फ नै प्रलेसले विशेष भूमिका खेल्नुपर्ने राष्ट्रिय परिषद्को बैठकले ठहर गरेको छ ।
७. अमेरिकी साम्राज्यवादले एम.सी.सी. को बहानामा हाम्रो भूमिमा आफ्नो भूमिका बढाउँदै गइरहेको सन्दर्भमा केही पैसाका लागि नेपालको राष्ट्रियतालाई नै कमजोर पार्ने, नेपालको कानुनभन्दा एम.सी.सी. को कानुनलाई बलियो बनाउन खोज्ने तथा अमेरिकी साम्राज्यवादको चलखेलका लागि सहज वातावरण बनाइदिने राष्ट्रघाती गतिविधि प्रलेसलाई स्वीकार्य नभएको बैठकले ठहर गर्दै मुलुकको हितविरोधी चलखेलका विरुद्ध प्रलेसको सशक्त भूमिका रहिरहने प्रतिबद्धता जाहेर गरिएको छ ।”
