गुडगाव (भारत) । मूल प्रवाह अखिल भारत नेपाली एकता समाज पश्चिमोत्तर क्षेत्रीय समिति अन्तर्गत गुडगाव नगर समितिको आयोजनामा खेलिएको २०७८ को देउसी भैलो कार्यक्रमको समीक्षा गरिएको छ ।
केन्द्रीय सचिवालय सदस्य धनवीर पुन मगरको प्रमुख आतिथ्यतामा सम्पन्न कार्यक्रममा केन्द्रीय सल्लाहकार सुरेशकुमार पाण्डे र सांस्कृतिक विभागका विष्णु नेपालीको समेत आतिथ्यता रहेको थियो ।
कार्यक्रममा मन्तव्य राख्दै पुन मगरले देउसी भैलो विशद्ध बुर्जुवा संस्कृतिको प्रारुप भएता पनि यसबाट सामाजिक रुपमा मत्वपूर्ण भूमिका निर्वाह गर्न सकिने बताउनु भयो । एकता समाजका लागि स्थापनाकालदेखि नै भारत प्रवासमा रहेका श्रमजीवी नेपालीहरु बीच मैत्रिपूर्ण भावना र उनीहरुमा एकता भावनाको विकासका लागि देउसी भैलोले महत्वपूर्ण भूमिका निर्वाह गर्दै आएको पुनको भनाई थियो । संगठन परिचालनका लागि पनि देउसी भैलोले सहयोग गर्दै आएको पुनले बताउनु भयो ।
नगर अध्यक्ष रण बहादुर थापाको अध्यक्षता र नगर सचिव सुरज गहतराजको सञ्चालनबाट अगाडि बढेको सो कार्यक्रममा सहभागीहरुलाई गोपाल भट्टराईले स्वागत गर्नुभएको थियो । दुई टिमका टिम लिडरहरु रामबहादुर विक र जित बहादुर विकले देउसी भैलो कार्यक्रमको समीक्षा गर्नुभएको थियो ।
गएको तिहारमा मूल प्रवाह अखिल भारत नेपाली एकता समाजले भारतव्यापी रुपमा देउसी भैलो कार्यक्रम सञ्चालन गरेको थियो । सो कार्यक्रमको समीक्षा अहिले विभिन्न नगर र क्षेत्रमा भइरहेको छ ।
