रिसव आचार्य, बुटवल ।
रक्तिम सांस्कृतिक अभियान रूपन्देही जिल्ला समितिले आयोजना गरेको देउसी भैलो कार्यक्रम समापन गरिएको छ । सोमबार बुटवल बेल्बासस्थित अर्घाखाँची क्याट्रिङ एण्ड पार्टी प्यालेसको परिसरमा भैलो खेलेर कार्यक्रम समापन गरिएको हो ।

कार्यक्रममा रक्तिम सांस्कृतिक अभियानका कलाकारहरुले तिहार सम्बन्धी विभिन्न जनवादी गीत तथा नृत्यहरु प्रस्तुत गरेका थिए । रक्तिम सांस्कृतिक अभियानका केन्द्रीय सदस्य तथा रूपन्देही जिल्ला अध्यक्ष सीता बस्याल नेतृत्वको टोलीले रूपन्देहीका विभिन्न स्थानमा कार्यक्रम प्रस्तुत गरेको थियो ।

कलाकारहरुले भैलो गीत, सोरठी नृत्य, ‘तिहारै आउँदा रमाइलो हुन्छ, देउसी र भैलोले’, पैयुँ फूल्दा त्यो लेक लेक’, सखिय हो (थारू भाषामा आधारित),उठ किसान (टप्पा नृत्य), आशिक गीत, पञ्चेबाजा, बाल कलाकारको ‘बाबा तिमी नबस विदेशमा, छिट्टै फर्कि आउ स्वेदस’,हुँदैन जित हाम्रो, फूल फुल्ने छ काँडा झरेर, चौपारीमा बसेर गीत गाउने चेलीबेटीलाई, सामन्तले नौजालै बुन्छ, झुक्दैन शिर हाम्रो, वन चरी नाच्दा, तलमा पर्यो बेँसीको फाँट (सालैजो), फूल फुल्ने छ कोपिला बनेर लगायतका कोशेलीहरु प्रस्तुत गरेका थिए ।

कार्यक्रममा कलाकारहरु तेजेन्द्र थापा, मिना बुढाथोकी, सीता बस्याल, भिमबहादुर राहादी मगर ,सिद्धार्थ मगर, पुजा नेपाली, आरती नेपाली, एलिसा पुन, ममता परियार, सृष्टि पुन, मिरा भुजेल, सीता केसी, आसिका चौहान, निर्मल क्षत्री लगायतका कलाकारहरुले प्रस्तुति प्रस्तुत गर्नु भएको थियो ।

साथै अखिल (छैठौं)का केन्द्रीय सचिव सरोजमान सिंह, केन्द्रीय सदस्य तथा रूपन्देही जिल्ला अध्यक्ष सागर बेल्बासे र केन्द्रीय सदस्य पुरन पोखरेलले कार्यक्रममा कार्यक्रम सञ्चालकको भूमिका निभाउनु भएको थियो । कार्यक्रममा अखिल (छैठौं) का केन्द्रीय सदस्य रिसव आचार्य, रूपन्देही जिल्ला सचिव मिलन परियार लगायत राजमो नेता कार्यकर्ताहरुको सहभागिता रहेको थियो ।

देउसी भैलो कार्यक्रम गत कात्तिक १८ गते बुटवलको पुरानो बसपार्कबाट सुरु भएको थियो । रूपन्देहीमा पाँच दिनसम्म चलेको देउसी भैलो कार्यक्रम उत्साहका साथ सकिएको रक्तिम रूपन्देहीका अध्यक्ष सीता बस्यालले बताउनुभयो । साथै दर्शकहरुले प्रगतिशील कला संस्कृतिलाई साथ दिएका थिए ।