काठमाडौं । राष्ट्रिय जनमोर्चा, काठमाडौं जिल्ला समितिले आयोजना गरेको देउसी भैलो कार्यक्रम समापन गरिएको छ । आइतबार कपनस्थित पार्टी केन्द्रीय कार्यालय परिसरमा भैलो खेलेर कार्यक्रम समापन गरिएको हो ।
कार्यक्रममा रक्तिम सांस्कृतिक अभियानका कलाकारहरुले तिहार सम्बन्धी विविध जनवादी गीत तथा नृत्यहरु प्रस्तुत गरेका थिए । रक्तिम सांस्कृतिक अभियानका केन्द्रीय सचिव हेमराज आश्रम नेतृत्वको टोलीले काठमाडौंका विभिन्न स्थानमा कार्यक्रम प्रस्तुत गरेको हो ।
कलाकारहरुले भैलो गीत, सोरठी नृत्य, ‘तिहारै आउँदा रमाइलो हुन्छ, देउसी र भैलोले’, पैयुँ फूल्दा त्यो लेक लेक’, ‘शिशिर चिर्ने वशन्तका फूलहरुलाई लाल सलाम’, काठमाडौंको सिंहदरबार (टप्पा नृत्य), आशिक गीत, पञ्चेबाजा, बाल कलाकारको ‘बाबा तिमी नबस विदेशमा, छिट्टै फर्कि आउ स्वेदस’, ‘छोड छोड साम्राज्यवाद, नेपाल भूमि छोड’ लगायतका कोशेलीहरु प्रस्तुत गरेका थिए ।
कार्यक्रम अन्तर्गत शनिबार पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्ड, नेपाल सरकारका अर्थमन्त्री जनार्दन शर्मा, गृहमन्त्री बालकृष्ण खाँड, सूचना तथा सञ्चार प्रविधि मन्त्री ज्ञानेन्द्रबहादुर कार्कीको निवास लगायत उपत्याकाका विभिन्न स्थानमा आफ्नो कार्यक्रम प्रस्तुत गरिएको थियो । त्यसक्रममा पूर्वप्रधानमन्त्री प्रचण्ड, अर्थमन्त्री जनार्दन शर्मासमेत देउसी भैलो टिमसँग नृत्य गर्दा कार्यक्रम थप रोचक बनेको थियो ।
कार्यक्रममा कलाकारहरु हेमराज आश्रम, निस्मा पुन, हरि सर्तुङ्गी, केशव गाह मगर, आकृति सिञ्जाली मगर, पवित्रा आचार्य, राम राना, भुपाल पुन, सिमा श्रीष, पूजा बेल्वासे, खगेन्द्र पाइजा, रेशम बुढाथोकी, रविना केसी, सिल्पा केसी, अंकित चुँदाली, शिशिर शर्मा, बन्दना विक, कविता चौधरी, एलिना ठकुरी, बालकलाकारद्वय सुप्रभात कार्की र ज्योत्सना गुरुङलगायत राजमो नेता कार्यकर्ताहरु सहभागी हुनुहुन्थ्यो ।
देउसी भैलो कार्यक्रम गत कात्तिक १७ गते वागबजारको हार्दिक होटलबाट शुभकामना आदान प्रदानसहित सुरु भएको थियो । उपत्यकामा पाँच दिनसम्म चलेको देउसी भैलो कार्यक्रम उत्साहका साथ सकिएको रक्तिमका कलाकार एवम् टोली नेता आश्रमले बताउनुभयो ।
यो पनिः राष्ट्रिय जनमोर्चाको देउसी भैलो कार्यक्रम सुरु, काठमाडौंमा शुभकामना आदान प्रदान
