काठमाडौं । तालिबानले कब्जा गरेपछि अफगानिस्तानमा अलपत्र परेका ३२ जना नेपाली शनिबार काठमाडौं आइपुग्ने भएका छन्।
नयाँ दिल्लीस्थित नेपाली दूतावासका अनुसार उनीहरुको शुक्रबार बिहान उद्वार गरिएको हो। ती नेपालीलाई महान एयरको जहाजबाट शुक्रबार बेलुका काबुलदेखि इरानको राजधानी तेहरान लगिएको छ।
यससँगै उद्धारका लागि निवेदन दिएका सबै नेपालीलाई काबुलबाट उद्धार गरी स्वदेश फर्काइएको छ। नेपाली तेहरानबाट दुबई हुँदै शनिबारकाठमाडौ आइपुग्ने छन्। नेपाल एयरलाइन्सको जहाजबाट २९ जना र फ्लाई दुबईको जहाजबाट तीनजना नेपाली आउने भएका हुन्।
गत १५ अगस्टमा अफगानिस्तानमा तालिबानले सत्ता हत्याएसँगै उनीहरुसहित करिब एक हजार नेपाली अलपत्र परेका थिए। ती नेपाली रोजगारीको खोजीमा अवैध माध्यमबाट अफगानिस्तान पुगेका थिए। नेपाली भिसाको म्याद सकिएका कारण स्वदेश फर्किनबाट रोकिएका थिए।
काबुलमा ८ स्थानमा छरिएर रहेका ती नेपालीलाई अफगानिस्तान समेत हेर्ने जिम्मा पाएको नेपाली दूतावास नयाँ दिल्लीको पहलमा एकै ठाउँमा भेला पारेर राखिएको थियो।
काबुलस्थित संयुक्त राष्ट्रसंघका विभिन्न निकायमा सुरक्षाकर्मी आपूर्ति गर्ने आइडीजी नामक बेलायती संस्थाको संरक्षणमा उनीहरुलाई राखिएको थियो। उद्वार गरिएका नेपालीको जहाज खर्च नेपाल सरकारले बेहोर्ने बताइएको छ ।
१५ दिनअघि अफगानिस्तानबाट दुई नेपालीको उद्वार गरी स्वदेश फर्काइएको थियो। तालिबानले कब्जा गरेपछि हालसम्म ९ सय भन्दा धेरै नेपाली अफगानिस्तानबाट स्वदेश फर्किएका छन्।
