काठमाडौं । हङकङबाट प्रकाशित हुँदै आएको पत्रिका एभरेष्ट साप्ताहिक तथा एभरेष्ट अनलाइनका सम्पादक किसन राई गम्भीर घाइते हुनुभएको छ । नेपाल आएका राई आइतबार राति भोजपुरमा भिरबाट लडेर घाइते हुनुभएको हो ।

ओखलढुङ्गाबाट भोजपुर जाने बाटोमा गाडी रोकेर पिशाव फेर्ने क्रममा राई भिरबाट खसेको परिवारका सदस्यले जनाएका छन् । राईको गम्भीर अवस्थामा उपचार भइरहेको छ ।

पारिवारिक स्रोतका अनुसार हालै मात्र नेपाल सरकारबाट पदक पाएका राई त्यही ग्रहण गर्ने क्रममा नेपाल आउनुभएको थियो । त्यसलगत्तै उहाँ साथीहरुसँग आफ्नो पुर्ख्यौली थलो धरानलगायत पहाडी क्षेत्र घुम्न निस्कनुभएको थियो ।

लामो समयदेखि हङकङमा बसोबास गर्दै आएका राई हङकङस्थित नेपाल पत्रकार महासंघको अध्यक्ष हुनुहुन्छ ।

उहाँको गम्भीर अवस्था भएपछि हङकङबाट परिवारका सदस्य नेपाल आउने तयारी गरिरहेको बताइएको छ ।