उदयपुर । नदी उत्खननको विषयलाई लिएर उदयपुरको बेलका नगरपालिकामा प्रहरी र स्थानीयवासीबीच झडप भएको छ ।
सिसुवा खोलाबाट अवैध रुपमा ढुंगा, गिटी निकालिएको भन्दै स्थानीयले लोड गरिएको २० वटा टिपरलाई केही दिनदेखि रोकिराखेका थिए । अवरोधमा उत्रिएका स्थानीयको माग सम्बोधन नगरी टिपरलाई सदरमुकामतर्फ लान खोजिएपछि झडप भएको हो ।
स्थितिलाई नियन्त्रणमा लिन प्रहरीले अश्रुग्याँस प्रहार गरेको थियो । झडपमा केही स्थानीय तथा तीन जना प्रहरी घाइते भएका छन् । घटनाको बिरोधमा स्थानीयले केहीबेर यातायात सेवा ठप्प पारेका थिए । प्रहरीले दमन गरेको भन्दै स्थानीयले बुधबार पूर्व–पश्चिम वैकल्पिक राजमार्गको रुपमा रहेको कोशीपुल–रुपनगर सडक ठप्प पारेका हुन् ।
स्थानीयले नियन्त्रणमा लिएका सबै टिपरहरु सिरहाको बीपी कन्स्ट्रक्सनका हुन् । उक्त कम्पनीले ३ करोड ५६ लाख रुपैयाँमा गत भदौमा सिसुवा खोलाबाट ढुङ्गा झिक्ने ठेक्का पाएको थियो । नगरपालिकाले स्थानीयको सहमतिबिनै ठेक्का लगाएको भन्दै विरोध गरेका छन् ।
