काठमाडौं । एसएलसी परीक्षा दिन डेरा लिएर बसेको अवस्थामा बलात्कारको शिकार भएकी बैतडीकी किशोरी पूजा बोहोराले आठ वर्षपछि न्याय पाएकी छन् । सर्वोच्च अदालतले पूजामाथि बलात्कार गर्ने दुई जनालाई साढे ११ वर्ष कैद सजाय तोकेको छ भने १० लाख रुपैयाँ क्षतिपुर्ति दिन आदेश दिएको छ ।
२०६८ चैत ९ गते एसएलसी परीक्षाको तयारीका लागि गेसपेपर किन्न बैतडीमा फोटो स्टुडियोमा गएकी पूजा त्यसै स्टुडियोको सञ्चालक सागर भट्ट र उनका साथी अमरराज अवस्थीको सामूहिक बलात्कारको शिकार भएकी थिइन् । सर्वोच्चका न्यायाधीश सपना मल्ल र हरि फुयाँलको संयुक्त इजलासले आरोपीद्वय सागर र अमरलाई सोमबार साढे ११ वर्ष कैद तथा १० लाख रुपैयाँ क्षतिपुर्ति दिन आदेश दिएको हो।
बैतडीका जिल्ला न्यायाधीश हिमालयराज पाठकको इजलासले यो मुद्दामा २०६९ फागुन २२ गते भट्ट र अवस्थीलाई १३ वर्ष कैद र ५० हजार रुपैयाँ जरिवाना सुनाएको थियो । तर २०७१ वैशाख १५ गते पुनरावेदन अदालतका न्यायाधीश नरबहादुर शाही र रमेशप्रसाद राजभण्डारीको संयुक्त इजलासले जिल्लाको फैसला उल्ट्याउँदै दुबै अभियुक्तलाई सफाइ दिएको थियो ।
तत्कालीन पुनरावेदन अदालत महेन्द्रनगरको फैसला उल्टाउँदै सर्वोच्चले कात्तिक ७ गते उनीहरुलाई दोषी ठहर गरेको थियो । दोषीमाथि सर्वोच्चले आज सजाय सुनाएको हो । पुनरावेदनको फैसलाविरुद्ध सरकारी वकिल कार्यालयले २०७१ मंसिर २१ गते सर्वोच्चमा मुद्दा दायर गरेको थियो ।
