खुम रायमाझी, कुवेत ।
कुवेतमा एक नेपालीको हृदयाघातबाट मृत्यु भएको छ । तनहुँको भिमाद नगरपालिका रिसिङपाटन घर भएका सरद परियारको आइतबार (अक्टोबर ३ तारिखमा) कार्यस्थलमै मृत्यु भएको हो ।

कुवेतको केआरएच कम्पनी मार्फत सेक्युरिटीको काम गर्दै आएका परियारको आइतबार बिहान ४ बजे कार्यस्थलमै मृत्यु भएको कुवेतमै रहेका मृतकका आफन्त गोबिन्द सुनामले बताएकाछन् ।

कोठाबाट सकुशल काम गर्न कार्यस्थल निस्केका परियार कम्पनीमा पुगेपछि अचानक ढलेका थिए । त्यसलगत्तै उनको मृत्यु भएको सहकर्मीहरुले बताए । सुनामका अनुसार उनी रक्तचापबाट पीडित थिए । उनको हृदयाघातका कारण ज्यान गएको अस्पताल श्रोतले पुष्टि गरेको छ ।

मृतकको शव आवश्यक कानुनी प्रक्रिया पुरा गरेर बुधबार कतार एयरलाइन्स मार्फत नेपाल पठाइएको कुवेतस्थित नेपाली राजदूतावास स्रोतले बताएको छ ।