लक्ष्मी चौधरी
काठमाडौं । भारतले नेपाली भूमि अतिक्रमण गरेको विरोधमा काठमाडौंमा पदयात्रा निकालिएको छ । ‘सिमा बचाऔं–नेपाल’ अभियानको आह्वानमा आइतबार काठमाडौंको भृकुटीमण्डप, पुतलीसडक, बागबजार हुँदै रत्नपार्कसम्म पदयात्रा निकालिएको हो ।
पदयात्रामा सहभागी भएकाहरुले ‘लिम्पियाधुरा, कालापानी र लिपुलेक नेपाली भूमि हो,’ ‘तत्काल सीमा अतिक्रमण बन्द गर’ लगायतका नाराबाजी गर्दै भारतको चर्को विरोध गर्नुभएको थियो ।
भारतीय अतिक्रमणको विरुद्धमा उनीहरुले पदयात्राका क्रममा नेपालको एक इन्च भूमि पनि नछाड्ने चेतावनीसहितको प्लेकार्डहरु पनि प्रर्दशन गरेका थिए । यसै गरी आइतबार स्रष्टाहरुले पनि भारतले नेपाली भूमि अतिक्रमण गरेकोमा आपत्ति जनाउँदै काठमाडौंमा प्रर्दशन गरेका थिए।
प्रगतिशील लेखक संघद्वार भोटाहिटीमा आयोजित सृजना वाचन कार्यक्रममा खगेन्द्र राई, मधु क्षेत्री, विमल निभा, बलराम तिमिल्सेना, डा. गोविन्द आचार्य, शोभा दुलाल, सीता शर्मा, स्नेह सायमी लगायतले आफ्नो सृजना वाचन तथा मन्तव्य राख्नुभएको थियो भने रक्तिम परिवार, जनसांस्कृतिक परिवार लगायतका कलाकारहरुले गीत प्रस्तुत गर्नुभएको थियो ।
प्रलेस अध्यक्ष जिवेन्द्रदेव गिरीको अध्यक्षता तथा महासचिव समिर सिंहको सञ्चालनमा सम्पन्न कार्यक्रममा आरसी न्यौपानेले स्वागत गर्नुभएको थियो ।
