बुटवल । सशस्त्र प्रहरीले रुपन्देहीबाट तीन ट्रक खसी बोकासहित ट्रकका चालक र खलासीलाई पक्राउ गरेको छ । देवदह नगरपालिका–९ स्थित घोडाहाबाट करिव २३ लाख ७३ हजार रुपैयाँ बराबरको ६ सय ७८ वटा खसीबोका बरामद गरिएको हो ।
पक्राउ पर्नेमा मकवानपुर जिल्लाको हेटौडा उपमहानगरपालिका ९ बस्ने ४३ वर्षीय प्रेम पण्डित, काठमाडौं जिल्लाको नागार्जुन नगरपालिका ७ भिमढुङ्गा बस्ने ३३ वर्षीय उमेश खत्री, दाङ जिल्लाको गढवा गाँउपालिका ५ बस्ने २५ वर्षीय अभिषेक यादव, बाँके जिल्लाको राप्ती सोनारी गाँउपालिका २ बस्ने ३४ वर्षीय ईश्वर पाण्डे, सोही गाँउपालिका १५ बस्ने १९ वर्षीय दिलिप सुनाखर र १८ वर्षीय राजु सुनाखर छन् ।
उनीहरुलाई सशस्त्र प्रहरी बल, नेपाल नम्वर ३८ गुल्म हेक्वा रुपन्देहीबाट खटिएको एपीएफ टोलीले पक्राउ गरेको हो । ना ७ ख ३४०, ना ६ ख ६६४८ र ना ५ ख ६६४१ नम्वरको ट्रकमा पश्चिमबाट पूर्वतर्फ लैजाँदै गरेको अवस्थामा उनीहरुलाई पक्राउ गरिएको सशस्त्रले जनाएको छ ।
एपीएफ टोलीले पक्राउ परेकाहरुलाई बरामद खसी तथा उक्त ट्रकसहित आवश्यक कारबाहीको लागि भैरहवा भन्सार कार्यालय रुपन्देहीमा बुझाएको छ। उक्त खसी तथा ट्रकको भन्सार मुल्य एक करोड १३ लाख ७३ हजार रुपैयाँ रहेको छ।
