खिमराज चालिसे ।
मूल प्रवाह अखिल भारत नेपाली एकता समाजको हिसार नगर समितिले आफ्ना चार जना कार्यकर्तालाई एक समारोहको आयोजना गरी प्रवासबाट विदाइ गरेको छ ।
सन् १९८७ देखि नगर समितिमा कार्यरत चन्द्र गैरे, सन् २००२ देखि महिला विभागमा कार्यरत कार्यकर्ता कौशल्या गैरे, सन् १९८९ देखि नगर समितिका कार्यकर्ता रहेका जोगेन्द्र दर्लामी तथा सन् २०१८ देखि महिला सदस्य रहेकी रमा दर्लामीलाई मूल प्रवाह हिसार नगरले बिदाइ गरेको हो ।
समारोहमा केन्द्रीय सल्लाहकार तारा सोमारेले नगर समितिको तर्फबाट प्रमाणपत्र दिँदै उहाँहरूको योगदानबारे चर्चा गर्दै देशको वामपन्थी आन्दोलनमा पनि उहाँहरूले महत्त्वपूर्ण योगदान दिने आशा व्यक्त गर्नुभएको थियो ।
त्यसै गरी उहाँहरूको योगदानको विषयमा गहकिला विचार राख्दै शुभकामना दिने वक्ताहरूमा मूल प्रवाह सुदूर पश्चिमोत्तर क्षेत्रीय सदस्य आत्माराम न्यौपाने, महिला क्षेत्रीय विभागकी सदस्य सेती राना, नगर सदस्य हुमाकान्त अधिकारी, सिटी एरिया अध्यक्ष ओमप्रकाश तिवारी, सिटी एरिया बीका अध्यक्ष केहरसिंह घर्तीमगर, इन्ड्रस्ट्रियल एरियाका अध्यक्ष लालबहादुर चुदाली, नगर महिला विभागकी कमला बगालेलगायत हुनुहुन्थ्यो ।
कार्यक्रम निरू सारूको सञ्चालनमा तथा बाबुराम शर्माको अध्यक्षतामा सम्पन्न भएको थियो भने स्वागत मन्तव्य श्यामबहादुर विकले गर्नुभएको थियो।
जोगेन्द्र दर्लामी र रमा दर्लामी पाल्पा जिल्ला, रैनादेवी छहरा गाउँपालिका वडा नं. ३ अमिले निवासी हुनुहुन्छ भने चन्द्र गैरे र कौशल्या गैरे नवलपुर जिल्ला, देवचुली नगरपालिका–१२ लक्ष्मीपुर निवासी हुनुहुन्छ ।
बिदाइ समारोहमा जोगेन्द्र दर्लामीले मूल प्रवाह हिसार नगर समितिलाई २,१०० भारु आर्थिक सहयोग पनि गर्नुभएको छ ।
