कञ्चनपुर । कञ्चनपुरमा रोकिराखेको ट्रकमा मोटरसाइकल ठोक्किँदा दुई युवकको मृत्यु भएको छ। दुर्घटनामा मोटरसाइकलमा सवार कृष्णपुर नगरपालिका–३ देखतभूलीका २४ वर्षीय दिनेश राना र २० वर्षीय सुनिल रानाको मृत्यु भएको प्रहरीले जनाएको छ ।

कृष्णपुर नगरपालिका–२ वाणीमा शनिबार राति सडकछेउ रोकिराखेको ना३ख १४२४ नंको ट्रकमा अनटेस्ट पल्सर मोटरसाइकल ठोक्किएको हो ।

इलाका प्रहरी कार्यालय झलारीका प्रहरी निरीक्षक नैनबहादुर साउदका अनुसार मोटरसाइकल ट्रकमा ठोक्किएपछि सख्त घाइते भएका दुवैलाई सेती प्रादेशिक अस्पताल धनगढी पुर्‍याइए पनि उपचारका क्रममा उनीहरूको मृत्यु भएको हो।

दुवैको शव परीक्षणका लागि अस्पतालमा राखिएको प्रहरीले जनाएको छ।