रेवाड़ी (भारत)। मूल प्रवाह अखिल भारत नेपाली एकता समाज रेवाड़ी नगर समितिको पहलमा करिब चार सय भन्दा बढी नेपालीले कोरोना विरुद्धको खोप लगाएका छन् । मूल प्रवाह र स्थानीय सामाजिक संगठन सड़क सुरक्षा संगठनको सहयोगमा कोरोना विरुद्वको खोप लगाइएको थियो ।
कार्यक्रममा स्वास्थ्य विभागका चिकित्सक र स्वास्थ्य कार्यकर्ताहरुले ४०४ जना नागरिकहरुलाई खोप लगाएका थिए जसमा खोप लगाउनेमा ३८० नेपाली नागरिक रहेका थिए ।
त्यस्तै, २८३ नेपाली नागरिक जोसँग आधार कार्ड, प्यानकार्ड वा कुनै पहिचान पत्र नै नभएकालाई खोप लगाउन सफल भएको नगर समितिका सचिव ज्ञान प्रसादले बताउनुभयो ।
खोप लगाउन रेवाड़ी संगै राजस्थानको नीमरानाबाट पनि नेपालीहरुको सहभागिता रहेको थियो।
त्यस्तै, मूल प्रवाहका नगर अध्यक्ष रामबहादुर खड़काले खोप शिविर सफलतापूर्वक सफल हुनुलाई आयोजन टिमको भुमिका महत्वपूर्ण रहेको बताउनु भयो । उहाँले संगठनको आवश्यकता र कार्यकर्ताहरुको विषयमा समेत प्रकाश पार्नुभएको थियो । उपाध्यक्ष विष्णु भण्डारीले खोप कार्यक्रम आवश्यकता बारे प्रकाश पर्दै संक्रमणबाट आफु पनि बचने र अरुलाई पनि बचाउने आग्रह गर्नुभयो ।
कार्यक्रममा मूल प्रवाह अखिल भारत नेपाली एकता समाजका कोषाध्यक्ष जोगबहादुर आले, सदस्य तेजवीर घर्ती, रूपेश रोका, विरु पुन, प्रेम अधिकारी, हिमलाल अधिकारी लगाएतले खोप कार्यक्रममा सहयोगीको भूमिका निभाउनु भएको थियो ।
ज्ञानप्रसाद शर्माको सञ्चालनमा खोप कार्यक्रम सुरु भएको थियो ।
कार्यक्रममा स्वास्थ्य विभागका जिल्ला प्रतिरक्षण अधिकारी डा. अशोक कुमारले कोरोना संक्रमणलाई हल्का रुपमा नलिन आग्रह गर्नुभएको थियो ।
