खिमराज चालिसे, चंडिगढ ।
मूल प्रवाह अखिल भारत नेपाली एकता समाजले बेग्लाबेग्लै रोगबाट ग्रस्त दुई नेपाली युवालाई उपचारका लागि आर्थिक सहयोग गरेको छ । आन्द्राको समस्याबाट पीडित गुल्मीका १९ वर्षीय कपिल विक र अर्घाखाँचीका २४ वर्षीय दीपक झाक्रीलाई मूल प्रवाहले सहयोग गरेको हो ।

गत २३ जुनदेखि पेटको आन्द्रासम्बन्धी रोगले ग्रत भई जनरल अस्पताल सेक्टर १६ चंडिगढमा उपचाररत गुल्मी जिल्ला मदाने गाउँपालिका–७ टिमुरखर्क निवासी कपिललाई एकता समाज चंडिगढले १६ हजार रुपैयाँ नेरु सहयोग हस्तान्तरण गरेको छ ।

मूल प्रवाहका केन्द्रीय सदस्य दिनेश खडका, केन्द्रीय सल्लाहकार एवम् नेपाली समाचारका संयोजक खिमराज चालिसे, सुदूरपश्चिमोत्तर महिला क्षेत्रीय सचिव जुना चालिसे, नगर अध्यक्ष मानबहादुर केसी र कोषाध्यक्ष किसन खनाल लगायत नेता कार्यकर्ता उनी उपचाररत हस्पिटलमा पुगी पीडितका आमा राधा विकलाई सो रकम हस्तान्तरण गर्नुभएको हो । मूल प्रवाह चंडिगढ इन्डस्ट्रीयल एरिया सदस्य डासीराम अर्याल निरन्तर हस्पिटलमा पीडितको देखरेखमा खटिएर सहयोग गर्नु भएको छ।

अहिलेसम्म उनको उपचारमा ४ लाख नेरु जति खर्च भएको कपिलका साइला बुबा लालबहादुर विकले बताउनुभयो । उनका अनुसार कपिलका बुवा केही वर्षदेखि बेपत्ता भएको र अति विपन्न परिवार भएकोले देश विदेश बाट भएको सहयोगकै आधारमा उनको उपचार चलिरहेको छ । करिब ३ महिनामा चारवटा अप्रेशन सफलतापूर्वक भएको तथा स्वास्थ्यमा क्रमिक सुधार भएको तर अझै पनि आर्थिक अभाव भएकोले सहयोगको लागि परिवारले अपिल गरेको छ ।

यता, अर्घाखाँची जिल्लाको शितगंगा नगरपालिका–७ जलुके निवासी प्रेम झाक्रीको छोरा दिपक झाक्रीलाई मूल प्रवाह संगरुर नगर समितिद्वारा सञ्चालित महिला विभागको सक्रियतामा नेरु २४ हजार ८३२ रुपैयाँ संकलन गरि सहयोग गरिएको छ ।

संगरुरमा वेटरमा कार्यरत तथा आर्थिक स्थिति विपन्न दिपलाई केही समय पहिला चोट लागेको र घाउ निको नभएकोले पीडितको थप उपचारार्थ मूल प्रवाहले सहयोग गरेको हो ।