खिमराज चालिसे, चंडिगढ ।
मूल प्रवाह अखिल भारत नेपाली एकता समाज सुदूरपश्चिमोत्तर क्षेत्रीय समितिद्वारा संचालित विभिन्न नगरहरुमा विहानैदेखि विरोध सभाहरु सुरु भएका छन् ।
नेपालमा अमेरिकी सहयोग परियोजना एमसीसी लागू गर्ने सरकारी प्रयासविरुद्ध राष्ट्रिय जनमोर्चाले आयोजना गरेको विरोध कार्यक्रमप्रति ऐक्यवद्धता जनाउँदै मूल प्रवाहले भारतमा विरोध प्रदर्शन गरेको हो ।
मूल प्रवाह लुथियाना नगर समितिको आयोजनामा मंगलबार विहान सम्पन्न कार्यक्रममा केन्द्रीय उपाध्यक्ष कपिल खनालले म्बिोधन गर्दै एमसीसी खारेजीको मागप्रति मूल प्रवाहको ऐक्यवद्धता प्रकट गर्नुभयो । उहाँले मूल प्रवाह जहिले पनि राष्ट्रियताको पक्षमा र विदेश हस्तक्षेप विरुद्ब उभिने बताउनुभयो ।
त्यस्तै अर्का उपाध्यक्ष हिरासिंह चन्दले एमसीसी भारत र चीनप्रति निगरानीको निमित्त नेपालको भूभाग प्रयोग गर्ने अमेरिकी साम्राज्यवादी हतकन्डा भएको बताउनु भयो ।
कार्यक्रम नगर अध्यक्ष उदैसिंह चन्दको अध्यक्षता तथा खुम बहादुर थापाको सञ्चालनमा सम्पन्न भएको हो ।
त्यसैगरि मूल प्रवाह सुदूरपश्चिमोत्तर क्षेत्रीय समितिद्वारा सञ्चालित सिरसाको कार्यक्रमलाई सम्बोधन गर्दै नगर समितिका अध्यक्ष अजीत बुढामगरले एमसीसी खारेजीको लागि संसारभरका श्रमजीवी नेपालीहरु एकढिक्का भएर आन्दोलन गर्नुपर्ने धारणा राख्नुभएको थियो ।
कार्यक्रम शंकरलाल गौतमको अध्यक्षता तथा सुरेश विकको सञ्चालनमा सम्पन्न भएको हो ।
आज (मंगलबार) राष्ट्रिय जनमोर्चाले एमसीसी खारेजीको माग गर्दै देशब्यापी प्रदर्शन गर्दैछ भने मूल प्रवाह अखिल भारत नेपाली एकता समाजले सो कार्यक्रमप्रति ऐक्यवद्धता जनाउन भारतका करिब ३५ स्थानमा कार्यक्रमको आयोजना गरेको छ ।
