काठमाडौँ । अन्तर्राष्ट्रिय नेपाली एकता समाजले एमसीसी विरुद्ध २०७८ भदौ २२ गते राष्ट्रिय जनमोर्चाद्वारा आयोजित विरोधसभाप्रति ऐक्यबद्धता जाहेर गरेको छ ।
अध्यक्ष दुर्गाबहादुर केसीको हस्ताक्षरमा भदौ २१ गते जारी प्रेसवक्तव्यमा एक्यबद्धता जनाइएको हो ।
पहिलेदेखि नै एमसिए–नेपाल गठन गरी प्रत्येक वर्ष बजेट प्रदान गर्ने गरिएकोमा अहिले एमसीसीका उच्चाधिकारी नेपाल आउन थालेको र त्यसरी एमसीसी पारित गर्ने प्रयास भइरहेको भन्दै एकता समाजले वक्तव्यमा त्यसको विरुद्धमा राजमोको आयोजनामा देशव्यापी विरोधसभा हुन थालेकोमा त्यसप्रति समर्थन तथा एक्बयद्धता रहेको जनाइएको छ ।
प्रेसवक्तव्यको पूर्ण पाठ यस्तो छ–
“अमेरिकी सुरक्षा नीतिअन्तर्गत रहेको हिन्दप्रसान्त रणनीति र त्यसको मातहतमा रहेको मिलेनियम च्यालेन्ज कर्पोरेसन (एमसिसी) पारित गर्न देशीविदेशी शक्ति पुनः सक्रिय हुन थालेको छ । यसभन्दा पहिलेका सरकारहरूले पनि एमसिसी पारित गर्नका लागि मिलेनियम च्यालेन्ज एकाउन्ट नेपाल (एमसिए–नेपाल) गठन गर्नुका साथै त्यसलाई प्रत्येक आर्थिक वर्षमा बजेट प्रदान गर्दै आएका थिए । अहिले एमसिसीलाई पारित गराउन त्यसका उपाध्यक्ष नै नेपाल आउन थालेको सञ्चार माध्यमहरूले दिएका छन् । त्यसका पछाडिको उद्देश्य नेपालको संसदबाट यथासम्भव छिटो एमसिसी पारित गराउने वातावरण तयार पार्नु नै हो भन्ने प्रष्ट नै छ ।
अमेरिकी साम्राज्यवादको सुरक्षा नीतिअन्तर्गत रहेकाले एमसिसी नेपालको स्वतन्त्र परराष्ट्र नीति अर्थात् पञ्चशील र असंलग्नताको विरुद्ध छ । एमसिसी मुख्यतः दक्षिण एसियामा चीनको विरुद्धमा मोर्चाबन्दी कायम गर्ने उद्देश्यका साथ अमेरिकाले भारतसमेतलाई सहयोगी बनाउँदै ल्याइएको देखिन्छ । त्यसैले एमसिसी नेपालको राष्ट्रियता र सार्वभौमिकताको विरुद्ध भएको स्पष्ट छ । यही सारतत्त्वका साथ देशभक्त शक्तिहरूले एमसिसीको देशव्यापी विरोध पनि भइरहेको छ ।
नेकपा (मसाल) र राष्ट्रिय जनमोर्चाले सुरुदेखि नै एमसिसीको अङ्ग्रपङ्क्तिमा रहेर विरोध गर्दै आइरहेका छन् । एमसिसी पारित गर्ने प्रयासस्वरूप देखा परेको पछिल्लो गतिविधिको विरोधमा राष्ट्रिय जनमोर्चाले २०७८ भदौ २२ गते देशव्यापी विरोधसभा आयोजना गरेको छ । अन्तर्राष्ट्रिय नेपाली एकता समाज उक्त विरोधसभाप्रति समर्थन तथा एक्यबद्धता प्रकट गर्दछ ।”
