प्युठान। प्युठानको ऐरावती गाउँपालिकाको वडा नं २ मा राष्ट्रिय जनमोर्चाका नेता भक्तबहादुर बिकले उम्मेद्वारी दर्ता गराउनुभएको छ । मंसिरमा १४ गते हुने उपनिर्वाचनका वडाअध्यक्ष पदमा बिकले मनोनयन दर्ता गर्नुभएको हो ।
बिकको प्रस्तावकमा केशवराज भट्टराई र समर्थकमा बशन्त जिसी रहनुभएको छ । जुलुशसहित बिहान ११ बजे मुख्य निर्वाचन अधिकृतको कार्यालय पुगेर उम्मेद्वारी दर्ता गरिएको राजमो केन्द्रीय सदस्य बोमबहादुर खत्रीले जानकारी दिनुभयो ।
उम्मेद्वारी दर्तापछि स्थानीय बरौंला बजारमा कोणसभाको आयोजना गरिएको छ । कोणसभालाई राजमो केन्द्रीय सदस्य खत्रीले सम्बोधन गर्दै हुनुहुन्छ भने उम्मेद्वार बिले आफ्नो प्रतिवद्धता व्यक्त गर्ने कार्यक्रम छ ।
राजमो र नेकपाबीच भएको चुनावी तालमेल अनुसार बिकले वाम गठबन्धनको साझा उम्मेद्वारका रुपमा उम्मेद्वारी दिनु भएको हो । राजमोले स्थानीय तहका अन्य स्थानमा भने नेकपाका उम्मेदवारलाई सघाउनेछ ।
दुई दलबीच भएको सहमति अनुसार नै प्रदेश सभा अन्तर्गत बाग्लुङको २ (ख) मा राजमोका तर्फबाट खिमविक्रम शाहीलाई उम्मेद्वार बनाइएको छ ।
स्थानीय तहअन्तर्गत एक नगरप्रमुख, तीन गाउँपालिका अध्यक्ष, एक गाउँपालिका उपाध्यक्ष र ४३ वडाअध्यक्षका लागि उपनिर्वाचन हुने छ । ३७ जिल्लामा हुने उपनिर्वाचनबाट प्रतिनिधिसभा सदस्य १, प्रदेशसभा सदस्य ३, स्थानीय तहको प्रमुख १, अध्यक्ष ३, उपाध्यक्ष १ र वडाअध्यक्ष ४३ पदमा जनप्रतिनिधि चुनिने छन् ।
बिभिन्न कारणले रिक्त ५२ पदका लागि मंसिर १४ गते उपनिर्वाचन हुन लागेको हो ।
