काठमाडौं । नगरकोटबासीले प्रचण्डका घरबेटी ठेकेदार शैलुङ कन्स्ट्रक्सनका मालिक शारदाप्रसाद अधिकारीको फोटो कुकुर र बाँदरसँगै सार्वजनिक स्थानमा झुण्ड्याएका छन् । दुई वर्षमा बनिसक्नुपर्ने भत्केकोपाटी–नगरकोट सडक साढे सात वर्षमा पनि नबनेपछि स्थानीयले विरोधको यस्तो शैली अपनाएका हुन् ।
नगरकोट आसपासका सार्वजनिक स्थान र त्यहाँ चल्ने सवारीहरुमा ठेकेदार अधिकारीका फोटासँगै कुुकर र बाँदरको फोटो राखेर लेलिएको छ, ‘शारदा अधिकारी ठेकेदार, सडकको कालोपत्र छिटो गर ।’
भत्केकोपाटी–खरिपाटी–तेलकोट हुँदै नगरकोटसम्म पुग्ने ४० किलोमिटर सडक दुई वर्षभित्रै सम्पन्न गर्ने जिम्मा शैलुङ कन्सट्रक्सनले पाएको छ । तर, साढे सात वर्ष पुगिसक्दा पनि काम कहिले सकिने भन्ने टुंगो छैन ।
काठमाडौंका विभिन्न स्थानमा निर्माणको जिम्मा लिएको उनको कम्पनी शैलुङ कन्स्ट्रक्सनले जताततै काम अलपत्र छोडेको भन्दै बेला बेलामा आलोचना हुने गरेको छ । प्रचण्डलाई आफ्नै घरमा बास दिएका उनले राजनीतिक आडमा काठमाडौंका विभिन्न सडक अलपत्र पारेको आरोप छ ।
२ सय ५१ सदस्यीय नगरकोट सडक पीडित संघर्ष समिति गठन गरेर सडक छिटो बनाउन माग गर्दै केही समय अघिदेखि स्थानीयबासिन्दा आन्दोलनमा छन्। जति आन्दोलन गरेपनि ठेकेदारले नसुनेपछि विरोधको नयाँ शैली अपनाउन परेको स्थानीयको भनाई छ।
