काठमाडौं । राष्ट्रिय जनमोर्चाका अध्यक्ष चित्रबहादुर केसीले गठबन्धन सरकारले आफ्नो न्यूनतम साझा कार्यक्रममा विदेशस्थित नेपालीलाई मतदानको व्यवस्था समेट्नु सकारात्मक भएको बताउनुभएको छ ।

सरकारमा सञ्चालनका लागि सत्तारुढ चार दलले बनाएको कार्यदलले बुझाएको प्रतिवेदनमा सो विषय उल्लेख छ । सरकारले प्रतिवेदन आज (आइतबार) सार्वजनिक गर्ने भएको छ। आइतबार दिउँसो चार बजे सिंहदरबारमा सत्तारुढ गठबन्धनका शीर्ष नेताको उपस्थितिमा न्यूनतम साझा कार्यक्रम सार्वजनिक गर्न लागिएको हो ।

प्रतिवेदनको बुँदा नं ३.२ (९) मा भनिएको छ, ‘विदेशमा रहेका नेपालीहरूलाई पनि मतदानको अधिकार दिलाउन पहल गर्ने ।’ सो कार्यक्रमलाई राष्ट्रिय जनमोर्चाले सकारात्मक रुपमा लिएको र अब कानुन निर्माणका लागि दबाब दिनुपर्ने आवश्यकता रहेको अध्यक्ष केसीले बताउनुभयो ।

‘हाम्रो पार्टीले विदेशमा रहेका नेपालीहरूलाई उनीहरू कार्यरत रहेकै स्थानबाट मतदानको व्यवस्था मिलाउन लगातार माग गर्दै आएको थियो । सरकारले आफ्नो न्यूनतम कार्यक्रममा त्यो विषयलाई समेटेको छ । जुन सकारात्मक छ’ केसीले युगदर्शनसँग भन्नुभयो, ‘अब कानुन बनाएरै यो विषय कार्यान्वयन गर्न मैले पाँच दलको बैठकमा सुझाव दिएको छु । कार्यान्वयनका लागि थप दबाब दिन आवश्यक छ ।’

यो पनि :यस्तो छ संयुक्त सरकारको साझा न्यूनतम कार्यक्रम (पूर्णपाठ)

यस्तै, अध्यक्ष केसीले एमसीसीलगायतका कतिपय विवादित विषय साझा कार्यक्रममा नआउनु पनि सकारात्मक भएको बताउनुभयो । तर, एमसीसी लागू गराउनेमा अमेरिकी साम्राज्यवाद प्रयासरत रहने भएकोले विरोध र भण्डाफोर गरिरहनु पर्नेमा अध्यक्ष केसीले जोड दिनुभयो ।

सत्तारुढ गठबन्धनले गठन गरेको सात सदस्यीय कार्यदलले सरकार सञ्चालनका लागि तयार गरेको न्यूनतम् साझा कार्यक्रम र कार्यविधि दुई दिनअघि मात्रै प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल प्रचण्डलाई हस्तान्तरण गरेको थियो ।

कांग्रेस महामन्त्री पूर्णबहादुर खड्का नेतृत्वको कार्यदलले दुई साता लगाएर साझा कार्यक्रम र कार्यविधि तयार गरेको थियो । शनिबार प्रधानमन्त्री निवास बालुवाटारमा बसेको सत्ता गठबन्धनको बैठकले आइतबार प्रतिवेदन सार्वजनिक गर्ने निर्णय गरेको हो ।

‘संयुक्त सरकारको साझा नीति तथा कार्यक्रम’ नाम दिइएको उक्त प्रतिवेदनमा संयुक्त सरकारका प्राथमिकता समावेश गरिएको छ ।
अध्यक्ष केसीले आफ्नो पार्टी सरकारमा सामेल नभएका कारण कार्यदलमा सामेल नभएको स्पष्ट पार्नुभयो ।

‘हामी सरकारमा जाँदैनौंँ । त्यसकार सत्तारुढ दलहरूको राजनीतिक संयन्त्र वा कार्यदलमा पनि बस्दैनौँ’ केसीले भन्नुभयो, ‘प्रधानमन्त्रीले बोलाएको बैठकमा गएर आफ्ना कुरा राख्छौं । राम्रो कामको समर्थन र नराम्रो काम गरे भण्डाफोर गर्छौैं ।’