गोविन्दकुमार शर्मा,काठमाडौँ ।
राष्ट्रिय जनमोर्चाका अध्यक्ष चित्रबहादुर केसीले केपी शर्मा ओलीको प्रतिगामी कदमका विरुद्ध पाँच विद्यार्थी सङ्गठनले चलाइरहेको संयुक्त आन्दोलनप्रति राजमोको प्रतिबद्धता व्यक्त गर्नुभएको छ ।
राजमो केन्द्रीय कार्यालय कपनमा २०७८ असार २४ गते पाँचै विद्यार्थी सङ्गठनका नेताहरूसितको भेटघाटमा उहाँले सो प्रतिबद्धता व्यक्त गर्नुभएको हो ।
सो अवसरमा अध्यक्ष केसीले पाँच दलको आआफ्ना नीति, सिद्धान्त रहेको र सोहीअनुसार आपसमा मतभेद भए पनि केपी ओलीको प्रतिगमनको विरुद्ध सहकार्य कायम रहेको बताउनुभयो ।
उहाँले अहिले राजनीतिक वृत्तमा पाँच दल पनि ओलीजस्तै हुन् भनेर बदनाम गर्न खोजे पनि आफूहरू प्रतिगमनको विरुद्ध लडेकाले बेग्लै स्थिति रहेको दावी गर्नुभयो ।
उहाँले प्रतिगमनलाई २०६२–६३ जनान्दोलनद्वारा प्राप्त उपलब्धिलाई घरको सङ्ज्ञा दिनुभयो ।
‘घरमा आगो लागिसकेपछि त्यसलाई निभाउन सबै मिल्नुपर्यो नि’ उहाँले अगाडि भन्नुभयो– ‘यस्तो बेलामा पनि आपसी मतभेद देखाएर हुन्छ र ?’ उहाँले थप्नुभयो– ‘त्यसो गर्ने हो भने त प्रतिगमनलाई परास्त गर्नै सकिन्न नि ।’ विद्यार्थी नेताहरूसित सङ्क्षिप्त कुराकानीमा उहाँले विगत स्मरण गर्नुभयो ।
‘हामी गिरिजाप्रसाद कोइरालाको शासनका विरुद्ध लडेका थियौँ । उहाँले पनि हामीलाई माले, मसाले, मण्डले एकै हुन् भन्नुहुन्थ्यो’ अध्यक्ष केसीले भन्नुभयो– ‘जब राजा ज्ञानेन्द्रले सीमित बहुदलीय व्यवस्था कू गरेका विरुद्ध हामी सात दल र माओवादी मिलेर २०६२–६३ को आन्दोलन लड्यौँ ।’
त्यो संयुक्त आन्दोलनले लोकतान्त्रिक गणतन्त्रात्मक व्यवस्था ल्याएको बताउँदै अध्यक्ष केसीले अहिले पनि स्थिति फेरि त्यही प्रकारको उत्पन्न भएको बताउनुभयो ।
अध्यक्ष केसीसित भेट गर्नका लागि अखिल (छैठौं) का अध्यक्ष विमल पोखरेल, नेपाल विद्यार्थी सङ्घका अध्यक्ष राजिव ढुङ्गाना, अखिल (क्रान्तिकारी) का रञ्जित तामाङ, अनेरास्ववियुका अध्यक्ष सुदेश पराजुली र समाजवादी विद्यार्थी युनियनका अध्यक्ष रूपनारायण श्रेष्ठसहितको टोली राजमो कार्यालय कपन पुगेको थियो ।
विद्यार्थी नेताहरूले आफूहरूको आन्दोलनप्रति प्रतिबद्धता जनाउन आग्रह गर्दै अध्यक्ष केसीलाई प्रतिबद्धता पत्र बुझाएका थिए ।
पाँच विद्यार्थी सङ्गठनले ओलीको प्रतिगमनका साथै निःशुल्क, शिक्षा, रोजगारी र स्वास्थ्यसमेतमा विषय समेत गरेर यतिखेर दोस्रो चरणको आन्दोलन सञ्चालन गरिरहेका छन् ।
भेटघाट कार्यक्रममा राजमोका महासचिव मनोज भट्ट, कोषाध्यक्ष मधु क्षेत्री तथा प्रगतिशील लेखक सङ्घका महासचिव समीर सिंहको सहभागिता रहेको थियो ।
