काठमाडौँ । पछिल्लो २४ घन्टामा दुई हजार छ सय २२ जनामा कोरोना सङ्क्रमण थप पुष्टि भएको छ भने दुई हजार दुई सय ११ जना निको भएर घर फर्केका छन् ।

सोमबार स्वास्थ्य तथा जनसङ्ख्या मन्त्रालयका अनुसार पछिल्लो २४ घन्टामा ११ हजार पाँच सय २७ परीक्षणबाट उक्त सङ्ख्यामा सङ्क्रमण पुष्टि भएको हो ।

मन्त्रालयका अनुसार मुलुकभरमा सात हजार चार सय ९९ जनाको पिसिआर परीक्षणबाट एक हजार सात सय ४५ जनामा सङ्क्रमण पुष्टि भएको छ भने चार हजार २८ जनाको एन्टिजेन परीक्षणबाट आठ सय ७७ जनामा पुष्टि भएको छ ।

मन्त्रालयका अनुसार पछिल्लो २४ घन्टामा २२११ जना सङ्क्रमणमुक्त भएका छन् ।

त्यसैगरी सोमबार २३ जनाको ज्यान गएको मन्त्रालयले जानकारी दिएको छ । यससँगै हालसम्म नौ हजार दुई सय ४८ जनाको मृत्यु भइसकेको छ । अहिलेसम्म कोरोनाबाट निको हुनेको दर ९४.६ प्रतिशत रहेको मन्त्रालयले बताएको छ ।