काठमाडौँ । आज देशभरिबाट दुई हजार तीन सय २८ जना नयाँ कोरोना सङ्क्रमित थपिएका छन् ।
स्वास्थ्य तथा जनसङ्ख्या मन्त्रालयले सार्वजनिक गरेको पछिल्लो विवरणमा सो सङ्ख्या किटान भएको हो ।
पाँच हजार आठ सय ३७ जनाको पिसिआर परीक्षण गर्दा एक हजार पाँच सय २७ र चार हजार दुई सय ९६ जनाको एन्टिजेन परीक्षण गर्दा आठ सय एक जनामा सङ्क्रमण पुष्टि भएको हो । यससँगै देशभर कोरोना सङ्क्रमितको कुल सङ्ख्या ६ लाख ४३ हजार ५८० (पीसीआर) र ३७ हजार ५५६ (एन्टिजेन) जना पुगेको छ
मन्त्रालयका अनुसार गत २४ घण्टामा तीन हजार ६६ जना निको भएर सङ्क्रमणमुक्त भएका छन् । यससँगै निको हुनेको सङ्ख्या हालसम्म ६ लाख ६ हजार ६६६ जना र निको हुनेको दर ९४ दशमलब तीन प्रतिशत पुगेको छ ।
यो अवधिमा १९ जनाले कोरोनाकै कारण ज्यान गुमाएका छन् । अहिलेसम्म कोरोनाबाट मृत्यु हुनेको सङ्ख्या नौ हजार एक सय ९८ पुगेको मन्त्रालयले जनाएको छ ।
हाल कोरोना भाइरसको सक्रिय सङ्क्रमितको सङ्ख्या २७ हजार ७१६ जना रहेका छन् । तीमध्ये २४ हजार ६७५ जना होम आइसोलेसनमा र ३०४१ जना होम आइसोलेसनमा छन् ।
काठमाडौं उपत्यकामा तीन सय ७६ जना नयाँ सङ्क्रमित थपिएका छन्, जसमध्ये काठमाडौंमा दुई सय ४६, ललितपुर ८१ र भक्तपुरमा ४९ जना थपिएका मन्त्रालयको तथ्याङ्क छ ।
