काठमाडौँ । नेपालमा क्यान्सरको उपचार तथा रोकथाममा उल्लेखनीय योगदान गरेको भन्दै जापानको कोबायासी फाउन्डेशनले नेपाल क्यान्सर हस्पिटल एन्ड रिसर्च सेन्टर हरिसिद्धिका कार्यकारी अध्यक्ष एवम् वरिष्ठ क्यान्सर रोग विशेषज्ञ डा. सुदीप श्रेष्ठलाई छैटौँ कोबायासी फाउन्डेसन पुरस्कार–२०२० प्रदान गरेको छ ।
यससँगै नेपालमा पनि क्यान्सर रोगको प्रभावकारी उपचार हुन्छ भन्ने सन्देश विश्वमा गएको देखिएको छ ।
पाँच लाख जापानी येन अर्थात् करिब रु. पाँच लाख ३६ हजार नेपाली राशीसहितको हेल्थकेयर प्रोफेसनलतर्फको उक्त पुरस्कार डा. श्रेष्ठलाई २०७८ असार ५ गते बिहान जापानमा आयोजना भएको क्यान्सरसम्बन्धी भर्चुअल विशेष सम्मेलनमा प्रदान गरिएको डा. श्रेष्ठले जानकारी दिनुभयो । फाउन्डेसनले २०७६ फागुनमा सो पुरस्कार प्रदान गर्ने घोषणा गरेको थियो ।
विश्वव्यापी महामारी कोरानाका कारण फाउन्डेसनको औपचारिक कार्यक्रम गत वर्ष स्थगित भएको थियो । केही महिनाअघिदेखि फेरि कोरानाकै कारण नेपाल र जापानमा लकडाउन भएकाले सो पुरस्कार डा. श्रेष्ठलाई आज भएको फाउन्डेसनको भर्चुअल सम्मेलनमा प्रदान गरिएको हो । पुरस्कारबापतको राशि र प्रशंसापत्र यसै हप्ता नेपाल आउने उहाँले जानकारी दिनुभयो ।
भर्चुअल विशेष सम्मेलनमा कार्यकारी अध्यक्ष डा. श्रेष्ठले कोरोनाका कारण क्यान्सर भएका बिरामीको उपचारमा केही कठिनाइ भए तापनि अस्पतालले स्वास्थ्य सुरक्षाका विभिन्न मापदण्ड अपनाएर चिकित्सक र स्वास्थ्यकर्मीको मनोबल उच्च राख्दै कोभिड भएका क्यान्सरका बिरामीको सफल उपचार गरिरहेको बताउनुभयो ।
थाइल्यान्डका डा. अरुनी देचाफुनकुल र हङकङका प्राडा टोनी मोकलाई पनि छैटौँ कोबायासी फाउन्डेसन पुरस्कार–२०२० प्रदान गरिएको छ ।
