काठमाडौं । पर्सामा अपहरणकारीको पञ्जाबाट प्रहरीले १४ वर्षीय बालकलाई मुक्त गरेको छ । त्यसक्रममा प्रहरीले चलाएको गोली लागि एक अपहरणकारी घाइते भएका छन् ।

वीरगञ्ज उपमहानगरपालिकामा पर्ने नेपाल–भारत सीमा क्षेत्रको खलबा टोलमा गए राती प्रहरीले अपहरणकारीमाथि गोली प्रहार गरेर बालकलाई अपहरणमुक्त गरेको हो । खुट्टामा गोली लागेका अपहरणकारीको वीरगञ्जस्थित नारायणी उपक्षेत्रीय अस्पतालमा उपचार भइरहेको छ । अपहरित बालक र अपहरणकारीको नाम सार्वजनिक भएको छैन ।

बनेपाबाट १० दिन अघि अपहरण गरेर ल्याइएका ति बालकलाई भारत रक्सौलको हरैया भन्ने ठाउँमा एक घरमा बन्दक बनाएर राखिएको अबस्थामा अपहरणमुक्त गरिएको प्रहरीले जनाएको छ ।

अपहरणकारीको साथबाट कटुवा पेस्तोल र गोली बरामद गरिएको जिल्ला प्रहरी कार्यालय पर्साले जनाएको छ । घटनाबारे आज पत्रकार सम्मेलन गरी प्रहरीले थप तथ्य सार्वजनिक गर्ने जनाएको छ ।