नवलपरासी (पूर्व) । कावासोती नगरपालिका–८ खरकट्टा जंगलस्थित राजमार्गबाट प्रहरीले ठुलो परिमाणमा लागु औषधसहित दुई जनालाई पक्राउ गरेको छ । पक्राउ पर्नेहरुमा चितवन भरतपुर महानगरपालिका–११ बस्ने ३३ वर्षीय सन्तोष खड्का र सोही ठाउँ बस्ने २४ वर्षीय सरोज सिंखडा रहेका छन् ।
उनीहरुको साथबाट प्रहरीले नुर्फिन १ सय ४३ एम्पुल, फेनरागन १ सय ४३ एम्पुल र डाइजेपाम १ सय ४३ एम्पुल बरामद गरेको छ ।
जिल्ला प्रहरी कार्यालयबाट खटिएको प्रहरीले ना.९ प ९४२७ नम्बरको मोटरसाइकल जाँच गर्दा मोटरसाइकलमा सवार उनीहरुको साथमा उक्त लागूऔषध फेला पारी दुवै जनालाई पक्राउ गरेको हो ।
यता, पोखरा महानगरपालिका–१२ चापापानी बस्ने २७ वर्षीय नबराज गुरुङ र सोही ठाउँ भद्रकाली बस्ने २४ वर्षीय पुकार गुरुङलाई नियन्त्रित लागूऔषध डाईजेपाम ६ एम्पुल, फेनरागन ६ एम्पुल, नुर्फिन ६ एम्पुल, नगद १४ हजार ५ सय ५० रुपैयाँ र मोबाइल १ थान सहित प्रहरीले पक्राउ गरेको छ ।
वडा प्रहरी कार्यालय रामबजारबाट खटिएको प्रहरीले सोही महानगरपालिका चाउथेस्थित धुब्रतारा होटलको कोठामा उनीहरुलाई उक्त लागूऔषध सहित फेला पारी प्रहरीले पक्राउ गरेको हो । यस सम्बन्धमा स्थानीय प्रहरीले आवश्यक अनुसन्धान गरिरहेको जनाएको छ ।
