दाङ । मुटु रोगबाट पीडित प्रगतिशील पत्रकार संघका उपाध्यक्ष महेश रिजालको उपचार सहयोग कोषमा दाङका युवाहरुले भैलो खेलेको रकम जम्मा गरिदिएका छन् । दाङ देउखुरीको राप्ती गाउँपालिका २ लालमटिया स्थित न्यु डान्स क्रियसनले भैलो खेलेको १० हजार रुपैयाँ प्रदान गरेको हो ।
महेश रिजाल उपचार सहयोग समितिका सदस्य चित्र महतरालाई न्यु डान्स क्रियसनका भैलो संयोजक आशीष न्यौपाने र व्यवस्थापक निरज भुसालले रकम हस्तान्तरण गर्नुभएको छ ।
राजमो दाङका उपाध्यक्षसमेत रहेका पत्रकार रिजाल यतिबेला सहिद गंगालाल राष्ट्रिय हृदय केन्द्र काठमाडौंमा उपचाररत हुनुहुन्छ । गत बिहीबार रिजालको शरीरमा पेस मेकर मेसिन जडान गरिएको छ भने मंसिर ३० गते उहाँको अप्रेसनको मिति ठेगान भएको छ।
रिजालको उपचारका लागि करिब पाँच लाख लाग्ने चिकित्सकहरुले बताएका छन् । आर्थिक अवस्था कमजोर भएका रिजालको उपचारमा सहयोग गरिदिन राजमो दाङ र नेपाल पत्रकार महासंघ दाङले छुट्टाछुट्टै अपिल गरेका छन् ।
