काठमाडौं । अखिल नेपाल युवक संघका काठमाडौं जिल्ला कोषाध्यक्ष अमृत आचार्यको उपचारका लागि बागलुङ समाज पोखराले आर्थिक सहयोग गरेको छ । जनगायक जीवन शर्माका छोरा अमृतको उपचारका लागि समाजले दुई लाख २६ हजार रुपैयाँ सहयोग गरेको हो ।
काठमाडौँस्थित शर्माको निवासमा समाजका अध्यक्ष कुलचन्द्र शर्मासहितको टोलीले अमृतका दाजु अर्जुन आचार्यलाई रकम हस्तान्तरण गरेको हो । सहयोग हस्तान्तरण कार्यक्रममा बागलुङ समाज पोखराका कार्यसमितिका पदाधिकारीको उपस्थिति थियो ।
बागलुङ समाज पोखराको समन्वयमा विभिन्न संघ संस्था तथा व्यक्तिद्वारा सो रकम संकलन गरिएको समाजले जनाएको छ । समाजले सामाजिक उत्तरदायित्वअन्तर्गत यस्ता किसिमका सहयोगात्मक कार्यक्रमलाई निरन्तरता दिँदै आएको अध्यक्ष शर्माले बताए ।
बडादशैँको नवमीका दिन अमृतको अन्ननलीमा मासुको हड्डी छिरेको थियो । त्यसबाट जटिल संक्रमण भएपछि त्रिवि शिक्षण अस्पतालमा उपचारका लागि भर्ना गरिएको थियो । अमृतको पेटको एउटा अप्रेसन भएको छ भने अर्को थप जटिल अप्रेसन गर्नुपर्ने चिकित्सकहरुले बताएका छन् ।
