गिरीप्रसाद बुढा/रुकुम पश्चिम ।।
विश्वव्यापी महामारीको रूपमा फैलिएको कोरोना भाइरसको नयाँ भेरियन्टको द्रुतगतिमा फैलिरहेको सङ्क्रमणले मानव जीवनलाई नयाँ सङ्कटको भुमरीमा पारिरहेको यस अप्ठ्यारो परिस्थितिमा रुकुम पश्चिम जिल्लामा क्रियाशील राजनीतिक दलहरूले जिल्ला प्रशासन कार्यालयलाई ज्ञापनपत्र बुझाएका छन् ।
२०७८ वैशाख २६ गतेका दिन सर्वदलीय बसेको बैठकको निर्णयानुसार ज्ञापन बुझाइएको राष्ट्रिय जनमोर्चा रुकुम पश्चिमले जनाएको छ ।
उक्त बैठकले गरेको निर्णयबमोजिम मिति २०७८ वैशाख २८ गतेका दिन रुकुम (पश्चिम) मा कोरोना भाइरसको रोकथाम, नियन्त्रण र सहज जनजीवन निर्वाहका निम्ति जिल्ला प्रशासन कार्यलयमार्फत सम्बन्धित निकायहरूलाई जिम्मेवार, जवाफदेही र कर्तव्यबोध गराउनको निम्ति संयुक्त राजनीतिक दलको तर्फबाट रुकुम पश्चिमका प्रमुख जिल्ला अधिकारी बद्रिनाथ गैरेसमक्ष विभिन्न विषयमा १६ बुँदे ज्ञापनपत्र पेस गरिएको हो ।
उक्त ज्ञापनपत्र पेस गर्नका निम्ति नेकपा (एमाले) का नन्दराम देवकोटा, नेपाली काङ्ग्रेसका कृष्ण रोकाय, जनता–समाजवादी पार्टीका प्रसराम खत्री, राष्ट्रिय जनमोर्चाका गिरीप्रसाद बुढा, नेकपाका नरेन्द्र विक, राप्रपाका सुधीरविक्रम शाहलगायतका प्रतिनिधिहरू जिल्ला प्रशासन कार्यालय पुग्नुभएको थियो ।
पेस गरिएको ज्ञापनपत्रमाथि आफ्नो भनाइ राख्दै प्रमुख जिल्ला अधिकारी बद्रिनाथ गैरेले कोरोना महामारी सम्बन्धमा समयमा राज्यको पहुँच पुग्न नसकेको, बजेटको व्यवस्थापनसहित स्थानीय तहलाई जिम्मा दिइएको भएता पनि स्थानीयस्तरले पनि समयमा नै ध्यान पुर्याउन नसकेको, संस्थागत क्वारेन्टाइनमा ध्यान पुर्याउन नसकिएको आदि कमजोरीको कारण तीव्र गतिमा सङ्क्रमण बढिरहेको बताउँदै हालको अवस्थामा आफ्नो सम्पूर्ण ध्यान कोभिड नियन्त्रणमा रहेको बताउनु भयो ।
यसै क्रममा उहाँले अब जिल्लामा दैनिक रूपमा २० वटा अक्सिजन भरिएको सिलिन्डर आपूर्ति हुने अस्पतालमा रहेको भेन्टिरलेटर सञ्चालन गर्नका लागि दक्ष जनशक्तिको खोजी गर्न लागिएको, जिल्ला सदरमुकाममा एउटा शववाहन र एउटा एम्बुलेन्स खरिद गर्ने निर्णय भइसकेको, त्यसैगरी चौरजहारीमा त्यहाँको नगरपालिकाले पनि एक शववाहन खरिद गर्न थालेको, सबै पालिकाहरूमा एकएक वटा एम्बुलेन्स तयारी अवस्थामा राखिएकोलगायतका विषयमा जानकारी गराउनुभएको थियो ।
आफू राज्यको प्रतिनिधि भएको नाताले सबै सरोकारवालाहरूसँग सोहीअनुरूप नै निस्पक्ष रूपमा समन्वय गरेर काम गर्दै आएको र आगामी दिनमा पनि यसरी नै अगाडि बढ्ने भन्दै संयुक्त दलले उठाएका विषयलाई आफूले महत्त्वका साथ लिएको र यी विषयहरूलाई लागु गर्नका लागि राजनीतिक दललगायत सबैको सहयोग लिएर अगाडि बढ्ने प्रतिबद्धता व्यक्त गर्नुभएको थियो ।
