काठमाडौँ । काठमाडौँमा एक सांसदको निवासबाट लाखौँ रुपैयाँ बराबरको नगद तथा गरगहना चोरी भएको छ । संखुवासभाबाट निर्वाचित नेकपाका सांसद राजेन्द्र गौतमको काठमाडौं महानगरपालिका–१० देवीनगरस्थित निवासबाट नगद र गरगहना चोरी भएको हो ।
सूचनाविभाग नजिकै सांसद गौतम बस्ने घरमा बिहीबार दिउँसो ३ बजेदेखि ४ बजेको समयमा चोरी भएको प्रहरीले जनाएको छ । घरको ढोका फोरेर कोठाभित्र रहेको नगद तथा गरगहना चोरी भएको सांसद गौतमले बताए । उनी सो घरमा फ्ल्याट भाडामा लिएर बस्थे ।
गौतमका अनुसार २ तोला ५ आना बराबरका सुनका गहना (६ आनाको औठी, ५ आनाको टप, ५ आनाको तिलहरी र १ तोलाको मंगलसुत्र) चोरी भएको छ । त्यस्तै चाँदीको २१ तोलाको थाली, २.५ तोलाको दियो तथा नगद एकलाख १५ हजार गरी ३ लाख १९ हजार रुपैयाँ बराबर चोरी भएको छ ।
घटनाबारे प्रहरीले मुचुल्का उठाएर अनुसन्धान सुरु गरेको छ । दिनदहाडै सांसदकै कोठाबाट चोरी भएपछि राजधानीको सुरक्षा व्यवस्थामाथि प्रश्न चिन्ह खडा भएको छ ।
