कोरोनाले गालेका मदनकृष्णको भावुक सन्देश : खेलाँची नगरौं, सबैको राम्रो सोचौं (भिडिओ)

आइतबार, बैशाख १९, २०७८ मा प्रकाशित

काठमाडौं । वरिष्ठ कलाकार मदनकृष्ण श्रेष्ठले आफूलाई कोरोनाले गालेको भन्दै भावुक सन्देश दिनुभएको छ । सामाजिक सञ्जाल ट्वीटरमा भिडियो सन्देश दिँदै श्रेष्ठले ‘सबैले सबैको राम्रो सोचौं’ भन्नुभएको छ ।

दोस्रो पटक कोरोना संक्रमित बनेका श्रेष्ठले ८ दिन राजधानीको मेडिसिटी अस्पताल बसेर शुक्रबार डिस्चार्ज भएसँगै एक भिडिओ सन्देश जारी गरेर कोभिड–१९ बाट सुरक्षित बस्न तथा सबैको भलो चिताउन आग्रह गर्नुभएको छ । श्रेष्ठका परिवारका पाँचै जनालाई संक्रमण भएको थियो ।

उहाँले कोरोनालाई खेलाँचीको रुपमा नलिन आग्रह गर्नुभयो । सावधानी अपनाउन, मास्कको प्रयोग गर्न र नियमित सावुन पानीले हात धुन आग्रह गरे। पार्किन्सन्सका बिरामी श्रेष्ठले बोलिरहँदा स्वास फुलेको भिडिओमा स्पष्ट देख्न सकिन्छ ।

मदनकृष्णले भन्नुभएको छ,
आठ दिन मेडिसटी अस्पतालमा उपचार गरेर डिस्चार्ज भएर घर आएको छु। खुसी पनि लागेको छ। अस्पतालको सेवा राम्रो थियो। तर यो दुखको घडी हो। यो संसारलाई महासंकट, प्रलय भएको कोरोना कहर। यो बेला सबैले सबैलाई माया गरौं, सबैले सबैको राम्रो हित सोचौं।

केही छैन जिन्दगी, केही रहिन्छ। शरीर फलाम जस्तो लाग्थ्यो पहाड फोड्दिँउ जस्तो लाग्थ्यो। हावा रहेछ सबै शरीर त१ केही रहिन्छ। त्यसकारण यो बेलामा कसैले कसैलाई पोलिटिकल इखबिख पोखेर कृतघ्न नबनाउन। मनलाई फोहर नबनाउ बाबा१ बिन्ति छ । सबले सबको राम्रो सोचौं। एकले अर्कोलाई वैमनश्यता भाव पालेर केही छैन। मनमा राक्षस पलाउने मात्र रहेछ। राक्षस होइन भगवान पलाउन पर्छ। यो सबैलाई थाहा छ खाली मैले सम्झाउन खोजेको मात्र हो।

यो कोरोनाले एकदमै गाल्दो रहेछ। जिउ यस्तो बन्यो जिन्दगीमा नभोगेको गलाई यो।

पहिलाको कोरोनाले इम्युनिटी पावर जिरो बनाइदिँदो रहेछ इनर्जी बाँकी हुने रहेछ। त्यसको ठिक उल्टो रहेछ अहिले इम्युनिटी पावर बाँकी रहने इनर्जी पावर जिरो बनाइदिँदो रहेछ। प्लेटको भातसमेत चम्चाले लिन नसकिने, मुख त धेरै कोश टाढाको कुरा।

मेरो पाँचै जना परिवारलाई कोरोनाले छोयो। पहिला एक जनालाई मात्र छोएको थियो यसपटक परिवारका परिवारलाई झ्याप्प पार्दो रहेछ।

एकले अर्कोलाई, कसैले कसैलाई वास्ता गर्न सकिएको थिएन। तातो पानी कसले तताउँने,खाना कसले बनाउने । आठ दिन बसेर आउँदा छिमेकीहरु, म एकदम भाग्मानी छु । उहाँहरुले मिठोमिठो खुवाउँनु भयो। देशभर यस्तै हुनुपर्छ । एकले अर्कालाई प्रेमको आखाले हेर्ने संसार सुख हुन्छ । संसारको दुर्दशा रहेछ । सबै मिलेर कोरोनालाई जित्नुपर्छ।

मास्क अत्यन्त जरुरी छ। असुरक्षित ठाउँमा नजानु होला, जानेवित्तिकै मास्क लगाउनु होला, दूरी कायम गर्नु होला, सावन पानीले हात धुनु होला अरु केही छैन यही हो।