गिरीप्रसाद बुढा, रुकुम पश्चिम ।
नेपाल कम्युनिष्ट पार्टी (मसाल) का प्रवक्ता रामप्रकाश पुरीले साम्राज्यवादविरुद्ध लड्न लेखक साहितयकारहरुको भूमिका महत्वपूर्ण हुने बताउनुभएको छ । अखिल नेपाल प्रगतिशील लेखक संघ (अन्पा) ले मंगलबार आयोजना गरेको कार्यक्रमलाई सम्बोधन गर्दै प्रवक्ता पुरीले साम्राज्यवादविरुद्ध सबै प्रगतिशील बौद्धिक व्यक्तित्वहरुलाई एकजुट बनाउनुपर्ने आवश्यकता औँल्याउनुभयो ।
संघको मासिक कार्यक्रमको छैठौं शृंखलाला अन्तर्गत रचनावाचन तथा अर्ध वार्षिक समिक्षा कार्यक्रममा प्रगतिवादी साहित्यकारसमेत रहेका प्रवक्ता पुरीले प्रगतिशील लेखक संघको गतिविधीको पनि समिक्षा गर्नुभएको थियो ।
उहाँले अखिल नेपाल प्रगतिशील लेखक संघ साम्राज्यवाद विरुद्ध लड्नको लागि अग्रिम पंक्तिमा उभिएको लेखक संघ हो भन्दै लेखकहरूलाई व्यापक रुपमा सहभागी गराई नयाँ नयाँ लेखक स्रष्टाहरूलाई प्रेरित गर्नु पर्ने बताउनुभयो । प्रवक्ता पुरीले आन्दोलन भित्र रहेको संकिर्णता र अराजकताबाट हुने सबैखाले भड्कावहरूबाट जोगाएर प्रगतिशील र प्रगतिवादी साहित्यलाई अगाडि बढाउनु पर्ने आवश्यकतामा पनि जोड दिनुभयो ।
यसैगरी बिषयबस्तु प्रस्तोताको तर्फबाट बुद्धिजीवी तथा वामपन्थी लेखक समिर सिंहले पनि कार्यक्रमको समिक्षा गर्नु भएको थियो । समिक्षाको क्रममा सांस्कृतिक आन्दोलनमा लेखकहरूको क्रान्तिकारी भूमिकालाई संस्थागत र प्रभावकारी बनाउनको लागि अखिल नेपाल प्रगतिशील लेखक संघको स्थापना भएको बताउँदै हामीसँग क्रान्तिकारी विचार र सिद्धान्त भएको हुँदा अरू बजारीया लेखक र कविहरू भन्दा हामी धेरै माथि उठेर संगठनलाई अगाडि बढाउनु पर्छ भन्नु भयो ।
अखिल नेपाल प्रगतिशील लेखक संघका सचिव गिरीप्रसाद बुढाको सञ्चालन तथा अध्यक्ष प्राडा गोविन्द आचार्यको अध्यक्षतामा सम्पन्न कार्यक्रममा रचना वाचन गर्ने स्रष्टाहरूमा खुमिराम भण्डारी, सुवास जिसी, अञ्जना मास्के, समष्टि बुढा मगर र रितु केसी हुनुहुन्थ्यो ।
