प्रकाश थापामगर/गोविन्दकुमार शर्मा, काठमाडौंँ ।।
राष्ट्रिय जनमोर्चाका नेता आनन्द शर्माले प्रतिनिधि सभा पुनःस्थापना भए जनतामा राजनीतिक स्थिरताको सन्देश जाने बताउनुभएको छ ।
राजमो काठमाडौँको आयोजनामा २०७७ माघ ९ गते काठमाडौँको दुर्गम स्थल शङ्खरापुर नगरपालिकाको जहरसिंपौवामा आयोजित विरोधसभामा प्रमुख अतिथिको आसनबाट मन्तव्य राख्दै उहाँले यस्तो अभिव्यक्ति दिनुभएको हो ।
‘हामी यस सन्दर्भमा स्पष्ट छौँ, प्रतिनिधि सभा पुनःस्थापना हुँदासाथ जनताका सबै समस्या समाधान हुने छैनन्’ नेता शर्माले अगाडि भन्नुभयो– ‘यदि प्रतिनिधि सभा पुनःस्थापना हुन्छ भने जनतामा राजनीतिक स्थिरताको सन्देश जाने छ ।’
उहाँले २०६२–६३ सालको जनान्दोलनपछि नेपाली जनताले राजनीतिक स्थिरता पनि चाहेको बताउनुभयो ।
‘दुईतिहाइको हाराहारीमा मत दिएर जनता ढुक्क थिए’ उहाँले भन्नुभयो– ‘तर, सत्तारूढ नेकपाले जनताको जनादेशलाई कायम राख्न सकेन ।’
जनअपेक्षा विपरीत गत पुस ५ गते अनपेक्षित रूपमा ओली सरकारले प्रतिनिधि सभा विघटन गरेको उहाँको भनाइ थियो ।
उहाँले ओली सरकारको प्रतिनिधि सभा विघटन गर्ने कार्यलाई असंवैधानिक र अधिनायकवादी कदम बताउनुभयो ।
‘असंवैधानिक यस अर्थमा हो’ उहाँले विस्तारका साथ भन्नुभयो– ‘वर्तमान संविधानले प्रधानमन्त्रीलाई प्रतिनिधि सभा विघटनको अनुमति दिँदैन ।’
२०७२ सालको संविधानमा राजनीतिक स्थिरताको पक्षमा थुप्रै प्रावधान राखिएको बताउँदै उहाँले गतकालमा जस्तो सहजै प्रतिनिधि सभा विघटनको अधिकार प्रधानमन्त्रीमा निहित नरहेको तर्क राख्नुभयो ।
त्यसैगरी ओली सरकारको प्रतिनिधि सभा विघटन गर्ने कार्यलाई अधिनायकवादी कदम भएको बताउँदै उहाँले भन्नुभयो– ‘पार्टीभित्र मतभेद हुँदा बहुमतको निर्णय नमान्ने वा स्वेच्छाचारी ढङ्गले अघि बढ्ने प्रधानमन्त्री ओलीको कार्यशैली अधिनायकवादी हो ।’
‘प्रतिनिधि सभामा मेरा विरुद्ध अविश्वास प्रस्ताव आयो, त्यसैले प्रतिनिधि सभा नै विघटन गरिदिएँ’ प्रधानमन्त्रीको ओलीको अभिव्यक्तिको प्रतिवाद गर्दै उहाँले भन्नुभयो– ‘यो तरिका अधिनायकवादी हो ।’
उहाँले लोकतन्त्रमा राजनीतिक पार्टीमा मतभेदबारे टुङ्गो लगाउन बहुमत–अल्पमतको विधि रहने बताउँदै प्रधानमन्त्री ओलीले पनि त्यो विधि स्वीकार्नुपर्ने बताउनुभयो ।
अर्कातिर उहाँले सत्तारूढ नेकपामा राष्ट्रियता, जनतन्त्र, जनजीविकाको पक्षमा कुनै मतभेद देखा नपरेको दावी गर्नुभयो ।
‘हाम्रा पक्षकालाई पदप्रतिष्ठा र लाभ पुगेन, त्यसकारण सत्तामा भागबण्डा चाहियो’ उहाँले विषयवस्तु प्रस्ट पार्दै भन्नुभयो– ‘यस ढङ्गले नेकपामा आन्तरिक मतभेद चर्कियो ।’
उहाँले भारतले नेपाली भूमि मिचिरहेको, जनजीविकाको अवस्था गम्भीर रहेको, कोरोना महामारीका कारण देश त्राही त्राही भएको, भ्रष्टाचारले मुलुक थला परेको, महङ्गी चरमचुलीमा पुगेको, सङ्घीयताले जातीय विग्रह र अर्थतन्त्र खोक्रो पार्दै लगेका बेला सत्तारूढ दलमा यसबारे कुनै छलफल नभएको बताउनुभयो ।
उहाँले प्रश्न गर्नुभयो– ‘यी विषयमा सत्तारूढ नेकपाका नेताहरूले चुइँक्क मुख खोलेको सुन्नुभएको छ ?’
वर्तमान राजनीतिक सङ्कटको सन्दर्भमा राष्ट्रिय जनमोर्चाको धारणा राख्दै उहाँले भन्नुभयो– ‘जुन ठाउँबाट गल्ती भएको छ, त्यही ठाउँबाट सच्याउनुपर्दछ ।’
उहाँले जोड दिएर भन्नुभयो– ‘प्रतिनिधि सभा पुनःस्थापना हुनुपर्दछ । यो आम जनताको माग हो ।’
कार्यक्रममा मन्तव्य राख्दै अखिल नेपाल जनजाति सम्मेलनका अध्यक्ष निमबहादुर बुढाथोकीले ठुला भनाउँदा राजनीतिक दलहरूले पटक–पटक संसद विघटन गर्ने गरेको बताउँदै अहिले केपी ओली सरकारले पनि असंवैधानिक तरिकाले प्रतिनिधि सभा विघटन गरेको बताउनुभयो ।
‘मलाई पार्टीभित्रकाले काम गर्न दिएनन्, त्यसैले प्रतिनिधि सभा विघटन गरिदिएँ’ प्रधानमन्त्री ओलीको अभिव्यक्तिबारे बुढाथोकीले भन्नुभयो– ‘यो कुनै संवैधानिक तर्क होइन ।’
नेकपा (मसाल) बागमती प्रदेशका प्रवक्ता समीर सिंहले सङ्घीयताले जनताको आधारभूत समस्या समाधान नगर्ने भएकाले त्यसलाई तत्कालै खारेज गर्नुपर्ने बताउनुभयो ।
‘जहरसिंपौवा निवासी जनतालाई हेटौँडामा राजधानी भएर के फाइदा छ ?’ उहाँले भन्नुभयो– ‘सङ्घीयताले आम जनताको समस्या समाधान गर्दैन, बरु उल्टै झन् जटिल बनाउँछ ।’
राष्ट्रिय जनमोर्चा बागमती प्रदेशका सचिव शिवहरि खनालले जनताले राजनीतिमा सक्रियतापूर्वक चासो राख्नुपर्ने बताउनुभयो ।
उहाँले भन्नुभयो– ‘जनताले राजनीतिप्रति बेवास्ता गर्ने हो भने त्यहाँ सधैँ जनविरोधी तत्त्वहरूकै हालीमुहाली भइरहने छ ।’
कार्यक्रममा अखिल नेपाल खेलकुद महासङ्घका संयोजक पृथ्वी थापा, रक्तिम सांस्कृतिक अभियानका केन्द्रीय कोषाध्यक्ष विष्णु शर्मा र जातीय समता समाजका केन्द्रीय सदस्य भक्त विकको पनि आतिथ्यता रहेको थियो ।
कार्यक्रमको अध्यक्षता राजमो काठमाडौँका उपाध्यक्ष राजेन्द्र पुडासैनीले गर्नुभएको थियो भने सञ्चालन नेकपा (मसाल) काठमाडौँका प्रवक्ता जगत्प्रसाद रेग्मीले ।
अखिल नेपाल महिला सङ्घकी केन्द्रीय कोषाध्यक्ष ऋतु केसीको स्वागत मन्तव्य रहेको सो विरोधसभामा रक्तिम सांस्कृतिक अभियानका कलाकारहरूले “झन्भन्दा झन् उच्च हुन्छ” र “मधेसी–पहाडी हिमालका हिमाली” शीर्षकको गीतमा नृत्य प्रस्तुत गर्नुभएको थियो ।
