काठमाडौं । निवर्तमान सभामुख कृष्णबहादुर महराको राजनीतिक जीवन नै धराशायी हुने गरी आफूमाथि ‘बलात्कार गरेको’ आरोप लगाएकी रोशनी शाहीले प्रहरीको दबाबमा महराविरुद्ध उजुरी दिएको जनाएकी छन् । शुक्रबार रोशनीको मोबाइल नं समेत राखेर जारी विज्ञप्तिमा उनले यौन दुर्व्यवहार भएको भनिएको दिनमा आफ्नो कोठामा महरा नआएको दाबी दाहाेर्याएकी छन् ।
बारम्बार बोली फेरेकी रोशनीले आफैले प्रहरीमा महराविरुद्ध दिएको किटानी जाहेरीको विपरित विज्ञप्ति प्रकाशित गरेकी हुन् । यद्यपी रोशनीले थाहै नपाई उनको नामको फेसबुकसमेत अपडेट भइरहेको र उनीमाथि चर्को मानसिक दबाब परेको समाचार आइरहेका बेला विज्ञप्तिको आधिकारिकता पुष्टि भएको छैन ।
विज्ञप्तिमा भनिएको छ, ‘२०७६/०६/१५ गते महानगरीय प्रहरी वृत्त बानेश्वरमा गई सत्यतथ्य बताउँदै असोज १२ गते महरा सर मेरो कोठामा नआएकोले बलात्कार प्रयासको कुरै भएन र महरा सर निर्दोष भएको कुराको सत्यतथ्य उल्लेख गरी निवेदन दर्ता गराएकी थिएँ ।’
उनले प्रहरीले आफूलाई सोधपुछको लागि भन्दै बोलाएर नौ घण्टासम्म बन्धक बनाएर महराविरुद्ध निवेदन दिन लगाएको दाबी पनि गरेकी छन् । ‘असोज १७ गते करीव ८.४५ बजे प्रहरी वृत्त बानेश्वरले मलाई सोधपुछका लागि भनेर बोलाई करीव ९ घण्टासम्म बन्धक बनाई मनोवैज्ञानिक तथा मानसिक दवाव दिएर कृष्णबहादुर महराले करणी प्रयास गरेको भनी फेरि निवेदन दर्ता गर्न लगाइएको हो ।’ विज्ञप्तिमा भनिएको छ ।
शाहीले १९ गते पत्रकार सम्मेलन गरी सत्यतथ्य जानकारी गराउन खोजेको तर प्रहरीकै कडा निगरानीका कारण असफल भएको दाबी पनि गरेकी छन् ।
गत असोज १३ गते राति रोशनी शाहीको कोठामा पसेर उनीमाथि बलात्कार प्रयास गरेको आरोप लागेपछि १५ असोजमा महराले सभामुख पदबाट राजीनामा दिएका थिए । रोशनीले किटानी जाहेरी दिएलगत्तै १८ गते सभामुखको सरकारी निवासबाटै महरा पक्राउ परेका थिए । महरालाई हिरासतमा लिएर प्रहरीले अनुसन्धान गरिरहेको छ ।
यस अघि घटना भएकाे भनिएकाे दिनमा विभिन्न राजनीतिक दलका नेता तथा सञ्चारकर्मीसँग आफुमाथि महराले याैन दुर्व्यवहार गरेकाे आराेप लगाएकी राेशनीले महराले सभामुख पदबाट राजीनामा दिएलगत्तै महरा आफ्नाे काेठामै नआएकाे र उनी आफ्नाे बुवासमान भएकाे बताएकी थिइन् । तर उनले पुन: प्रहरीकहाँ महराविरुद्ध जवर्जस्ती करणी मुद्दामा उजुरी दिएकी थिइन् । उनकै उजुरीका आधारमा महरा पक्राउ परेका हुन् । यही बीचमा राेशनी र उनका पतिबीच सम्बन्ध विच्छेदकाे घाेषणासमेत भएकाे थियाे ।
आफूलाई मुछेकोमा पूर्व सभामुख ओनसरीको आपत्ती
पूर्व सभामुख ओनसरी घर्तीले सो घटनामा नेकपाका नेतासहित आफूलाई मुछेकोमा आपत्ती जनाएकी छन् । उनले घटना भएको भनिएको दिनदेखि आजसम्म सम्बन्धित ब्यक्तिहरुलाई नभेटेको पनि स्पष्ट पारेकी छन् ।
नेकपाका अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’, ऊर्जामन्त्री वर्षमान पुन र आफ्नो नाम समेत जोडर तत्कालिन सभामुख महराका विषयमा अनावश्यक टिप्पणी गरेको प्रति आक्रोश व्यक्त गर्दै पूर्वसभामुख घर्तीले त्यस्ताखाले सबै आरोपहरु आफूले खारेज गर्ने बताईन् ।
महरालाई फसाउन प्रधानमन्त्री ओली, पूर्व सभामुख सुवासचन्द्र नेम्वाङ र ओनसरी घर्ती समेत लागेको कतिपयले आरोप लगाएको भन्दै ओनसरीले आपत्ति जनाएकी हुन् ।
