काठमाडौं । प्रधानमन्त्री केपी शर्मा ओलीले हरेक घटनाको निष्पक्ष छानबिन गर्न प्रहरी स्वतन्त्र रहेको बताएका छन् ।
प्रहरी प्रधान कार्यालयले ६४ औं प्रहरी दिवसको अवसरमा शुक्रबार आयोजना गरेको कार्यक्रममा प्रधानमन्त्री ओलीले पद र अनुहार नहेरी अपराधबारे अनुसन्धान गर्न प्रहरीलाई निर्देशन दिएका हुन् ।
धानमन्त्री ओलीले भने, ‘कुन पार्टी सरकारमा छ, कुन बाहिर छ, प्रहरीले वास्ता गर्नु पर्दैन । कुन पदको, कसले अपराध गर्यो, त्यो पनि प्रहरीले मतलब गर्नुहुन्न ।
प्रहरीले अनुहार नहेरी कानूनको पालना गर्न गर्नुपर्छ ।’
प्रधानमन्त्री ओलीले अपराध अनुसन्धानमा कसैको दबाव नसुन्न पनि प्रहरीलाई आग्रह गरे ।
कार्यक्रममा ४३ जना प्रहरीलाई अमर प्रहरी घोषित गरिएको छ । कर्तव्य पालनको सिलसिलामा ज्यान गुमाएका आफ्ना ४३ जना प्रहरीलाई नेपाल प्रहरीले अमर प्रहरी घोषणा गरेको हो ।
त्यस्तै, पूर्व एआईजी यादव अधिकारीलाई लाइफटाइम अचिभ्मेन्ट अवार्डबाट सम्मानित गरिएको छ । यस वर्षको उत्कृष्ट कार्य सम्पादनतर्फको अवार्ड हाल मोरङ प्रहरीमा कार्यरत एसपी मनोज केसीलाई प्रदान गरिएको छ ।
प्रधानमन्त्री केपी शर्मा ओलीले प्रहरी दिवस र अमर प्रहरी दिवस फरक फरक दिनमा मनाउन सुझाव पनि दिएका छन् ।
कार्यक्रममा गृहमन्त्री रामबहादुर थापा बादल र प्रहरी महानिरीक्षक सर्वेन्द्र खनालले पनि आफ्नो धारणा राखेका थिए ।
