तिलक थापा/बागलुङ ।
राष्ट्रिय जनमोर्चा बागलुङले सङ्गठन निर्माणसँगै सङ्घर्षका कार्यक्रमलाई अगाडि बढाउने गरी दुईहप्ते कार्यक्रम घोषणा गरेको छ । जिल्लाध्यक्ष अमर थापाको अध्यक्षतामा बसेको जिल्ला समितिको बैठकले सङ्गठन निर्माण र सङ्घर्षका कार्यक्रम गर्ने निर्णय गरेको हो ।
पूर्व केन्द्रीय सचिव कृष्ण अधिकारीको उपस्थितिमा बागलुङ बजारमा बसेको बैठकले ‘गणतन्त्र, राष्ट्रियता र धर्म निरपेक्षताको रक्षा गरौँ, सङ्घीयता र भ्रष्टाचारको विरोध गरौँ’ भन्ने नाराका साथ देशव्यापी रूपमा हुने सङ्घर्षका कार्यक्रमअन्तर्गत पौष १ देखि १६ गतेसम्म विभिन्न सङ्घर्षका कार्यक्रम र पालिकातहमा अगुवा कार्यकर्ता प्रशिक्षण सञ्चालन गर्ने निर्णय गरेको हो । त्यसअन्तर्गत आगामी पुस ३ गते बागलुङ बजारमा मोटरसाइकल र्याली प्रदर्शन गरिने भएको छ ।
बैठकपछि अध्यक्ष थापाद्वारा आइतबार जारी प्रेसवक्तव्यमा भनिएको छ– ‘‘राष्ट्रिय जनमोर्चा केन्द्रीय समितिले हाल देशमा देखा परेको अस्थिरता, भ्रष्टाचार, प्रतिगमनको खतराका विरुद्ध साथै सङ्घीयताको खारेजीका लागि देशव्यापी सङ्घर्ष र सङ्गठनात्मक अभियानका कार्यक्रम गर्ने निर्णयलाई बागलुङ जिल्लामा पनि सफल पार्ने निर्णय भएको छ ।’
राजमो बागलुङले पौष १७ गतेदेखि २९ गतेसम्म विशेष सङ्गठनात्मक अभियान र सङ्घर्षका कार्यक्रम सञ्चालन गर्ने छ । जिल्लाव्यापी रूपमा चल्ने यो अभियान ३ टोली निर्माण गरी सञ्चालन गरिने छ । केन्द्रीय सदस्यद्वय राजेन्द्र ढुङ्गाना र डिलबहादुर दर्जी, प्रदेशसभा सांसद कृष्ण थापा, राष्ट्रिय परिषद् सदस्य तिलक थापा, बरेङ गापा अध्यक्ष कृष्ण पौडेल र नरबहादुर पुन रहेको टोलीले बरेङ गाउँपालिका र जैमिनी नगरपालिका कार्यक्रम गर्ने छ ।
त्यस्तै, जिल्ला अध्यक्ष अमर थापा, उपाध्यक्ष धर्म कुँवर, सचिव भिमलाल पोखरेल, जिल्ला सल्लाहकार वेदीलाल सापकोटा, जिल्ला सदस्य लक्ष्मण पुन, लोकनाथ शर्मा र लक्ष्मी बास्कोटा रहेको टोलीले गल्कोट नगरपालिका, ताराखोला गाउँपालिका, काठेखोला गाउँपालिका र बागलुङ नगरपालिकामा कार्यक्रम गर्ने छ ।
यस्तै, राष्ट्रिय परिषद सदस्य गौरीश्वर पाण्डे, पूर्व केन्द्रीय सचिव कृष्ण अधिकारी, प्रदेशसभा सांसद खिमविक्रम शाही, भिमसेन वन, मेकबहादुर पाइजा र प्रगति बुढा रहेको टोलीले निसिखोला गाउँपालिका, ढोरपाटन नगरपालिका, तमानखोला गाउँपालिका र बडिगाड गाउँपालिकामा कार्यक्रम गर्ने छ ।
