काठमाडौं । राष्ट्रिय जनमोर्चाले निवर्तमान सभामुख कृष्णबहादुर महराविरुद्धको यौन दुराचार आरोपबारे उचित छानबिन गरी सत्य तथ्य बाहिर ल्याउन आग्रह गरेको छ ।
घटनाबारे बेग्लाबेग्लै विवरणहरु बाहिर आएकाले सो विषय बढी जटिल बनेको भन्दै त्यसबारे छानबिन गरी न्यायोचित कारबाही गर्नुपर्नेमा राजमोले जोड दिएको छ ।
अध्यक्ष चित्रबहादुर केसीद्वारा जारी विज्ञप्तिमा भनिएको छः ‘निवर्तमान सभामुख कृष्ण बहादुर महरा र संसद सचिवालयमा कार्यरत कर्मचारी रोशनी शाहीबारे जुन समाचारहरु बाहिर आएका छन्, त्यसबारे वास्तविकता के हो ? त्यसबारे छिटै प्रकाश हाल्नुपर्ने आवश्यकतामा राष्ट्रिय जनमोर्चाले जोड दिन्छ । उक्त विषयमा अहिलेसम्म बेग्लाबेग्लै विवरण र बयानहरु बाहिर आएका छन् । त्यसले गर्दा उक्त विषयमा बढी जटिलता र भ्रम उत्पन्न भएको छ । त्यसबारे सत्य तथ्य पत्ता लगाइ न्यायोचित कारवाही गर्नु सरकारको जिम्मेवारी हुन्छ । सरकारले छिटै नै यसबारेमा आवश्यक छानवीन गरी वास्तविक तथ्यलाई बाहिर ल्याउन र उक्त विषयमा आवश्यकता अनुसार न्यायोचित कारवाही अगाडि बढाउन हामीले सरकारसित माग गर्दछौँ ।’
