बागलुङ । राष्ट्रिय जनमोर्चाका अध्यक्ष चित्र बहादुर केसीले भारतीय हस्तक्षेपको विरोध नगरे नेपालले जम्मु कश्मिरको अवस्था भोग्नु पर्ने चेतावनी दिनुभएको छ । स्वतन्त्र मुलुक रहेका सिकिम, जम्मुकाश्मिर लगायत भारतको प्रान्त बनेको स्मरण गर्दै केसीले नेपालले पनि हस्तक्षेपको विरोध नगरे कुनै समय त्यही नियति भोग्नु पर्ने बताउनुभएको हो ।
अध्यक्ष केसी राष्ट्रिय जनमोर्चा बागलुङ नगर समितिले सञ्चालन गरेको राष्ट्रिय स्वाधीनताको लागि गाउँ जागरण अभियान अन्तरगत शुक्रबार बागलुङ बजारमा आयोजना गरेको शुभकामना आदान प्रदान तथा भेटघाट कार्यक्रममा सम्बोधन गर्दै नेपालमा भारतीय हस्तक्षेप बढेकोमा चिन्ता व्यक्त गर्नुभयो ।
‘केही वर्ष पहिलेसम्म भारत नेपालका केही व्यक्तिलाई मात्र हात लिएर हस्तक्षेप गर्ने गरेकोमा अहिले दल नै खडा गरेर हस्तक्षेप बढाएको छ’ उहाँले भन्नुभयो, ‘नेपालको कालापानीमा भारतीय सेना राखेको छ । सुस्ता लगायतका धेरै नेपाली भूमि भारतले हडपेको छ । तर, सरकार विलदेशी हस्तक्षेपविरुद्ध नबोल्नु लज्जा र आपत्तिजनक हो ।’
केसीले संघीयताकै कारण मुलुक असफल राष्ट्र बन्न लागेको भन्दै यसले मुलुकको अस्तित्व नै गुम्न सक्ने खतरा बढेको पनि बताउनुभयो ।कार्यक्रममा राष्ट्रिय जनमोर्चाका नेता तथा गण्डकी प्रदेशका प्रदेश मामिला सभापती कृष्ण थापा, राष्ट्रिय जनमोर्चा बागलुङका अध्यक्ष अमर थापालगायत नेताहरुले मन्तव्य राख्नु भएको थियो ।
कार्यक्रममा राष्ट्रिय जनमोर्चाका पूर्व सचिव कृष्ण अधिकारी, अखिल नेपाल जनजाती सम्मेलनका केन्द्रीय उपाध्यक्ष केवी थापा, राष्ट्रिय जनमोर्चाका राष्ट्रिय परिषद सदस्य तिलक थापा, जिल्ला सचिव भीमलाल पोखरेल, जिल्ला सल्लाहकार काजीगाँउले श्रेष्ठ, जिल्ला सदस्यहरु लोकनाथ शर्मा, लक्ष्मण पुन, प्रेम गौतम, रुद्रा केसी अखिल नेपाल शिक्षक संघका केन्द्रीय सल्लाहकार गोविन्द्र प्रसाद पौडेल, अखिल नेपाल किसान संघ बागलुङका सदस्य ढुण्डीराज पौडेल, अखिल (छैठौं)का जिल्ला सदस्य गोपाल सुवेदी, अखिल नेपाल राष्ट्रिय उद्योग व्यापार संघका जिल्ला कोषाध्यक्ष टेक बहादुर क्षेत्री, अखिल नेपाल पत्रकार महासंघका जिल्ला कोषाध्यक्ष विजय राना लगायतको आतित्थ्यता रहेको थियो ।
कार्यक्रम जिल्ला सदस्य तथा बागलुङ नगर अध्यक्ष थानेश्वर सुवेदीको अध्यक्षता, लक्ष्मी वास्कोटाको सञ्चालन र जिल्ला सदस्य तथा नगर उपाध्यक्ष योगेन्द्रराज पौडेलको स्वागत मन्तव्यमा सम्पन्न भएको थियो ।
