काठमाडौं । कात्तिक १ गतेदेदि सुरु हुन लागेको ‘विश्व सैन्य खेलकुद’ प्रतियोगितामा नेपाली सेना पहिलो पटक सहभागी हुने भएको छ ।चीनको यूहान प्रान्तमा हुने सातौं विश्व सैन्य खेलकुद प्रतियोगितामा पहिलो पटक नेपाली सेना सहगागी हुन लागेको हो ।
अन्तर्राष्ट्रिय सैनिक खेलकुद परिषदको आयोजनामा हुन लागेको सो प्रतियोगितामा नेपाली सेनाले पनि पहिलो पटक भाग लिन लागेको नेपाली सेनाले बुधबार काठमाडौंमा पत्रकार सम्मेलन गरी जानकारी दिएको छ । खेलकुदको माध्यामबाट विश्वमा शान्ति स्थापना गर्ने मूख्य उद्देश्यका साथ अन्तर्राष्ट्रिय सैनिक खेलकुद परिषदले यो प्रतियोगिता आयोजना गर्दै आएको छ ।
यो खेलकुद प्रतियोगितामा २५ वटा खेल र दुई वटा प्रर्दशन खेल गरी २७ वटा खेलहरु प्रदर्शन हुनेछन् । जसमा १०५ राष्ट्रका १० हजार ७१९ जना खेलाडीहरु सहभागी हुनेछन् ।
प्रतियोगितामा नेपाली सेनाले आर्चरी, ब्याटमिन्टन, बक्सिङ, घोडचढी, जुडो, तेक्वान्दो, कुस्ती, बिच बलिवल, मोर्डन पन्टाथलन, ट्रयाक एण्ड फिल्डलगायतका १३ वटा खेलकुद प्रतियोगितामा भाग लिनेछ । प्रतियोगिताको उद्घाटन सत्रमा विशेष अतिथिको रुपमा उपप्रधानमन्त्री एवम् रक्षामन्त्री ईश्वर पोखरेल पनि सहभागी हुने नेपाली सेनाले जनाएको छ ।
