काठमाडौँ । चीनमा जारी ‘बेल्ट एन्ड रोड’ यू–१९ महिला क्रिकेट सिरिजमा नेपालले लगातार तेस्रो जित निकालेको छ । तेस्रो जित निकाल्ने क्रममा नेपालले आजको खेलमा थाइल्यान्डलाई ५२ रनले पराजित गरेको हो ।
यो खेलमा पहिला ब्याटिङ गर्दै नेपालले निर्धारित २० ओभरमा पाँच विकेट गुमाएर एक सय रन बनायो । नेपालका लागि कप्तान सोनि पाख्रिनले ३२, साना प्रवीणले २५ र अञ्जिला पाठकले १३ रन बनाइन् ।
एक सय एक रनको लक्ष्यका साथ जबाफी ब्याटिङमा उत्रिएको थाइल्यान्ड १९ दशमलव दुई ओभरमा ४८ रनमै अलआउट भयो । उसका लागि कुनै पनि ब्याटरले सम्झनलायक प्रदर्शन गर्न सकेनन् । नेपालका लागि बलिङतर्फ कप्तान सोनि पाख्रिनले तीन तथा अनु कडायत, मनिषाकुमारी उपाध्याय र रिया शर्माले समान दुई/दुई विकेट लिइन् ।
यस प्रतियोगितामा नेपालसहित आयोजक चीन, हङकङ र थाइल्याण्डले प्रतिस्पर्धा गरिरहेका छन् ।
नेपालले आगामी वर्ष घरेलु मैदानमा हुने आइसिसी यू–१९ महिला विश्कपको तयारीस्वरूप चीनमा शृङ्खला खेलिरहेको हो । चीनमा शृङ्खला खेलेपछि नेपाली टोलीले भारतमा अभ्यास गर्ने तालिका छ ।
