कुलबहादुर छन्त्याल, ढोरपाटन (बागलुङ) ।
स्नेहा पौडेललाई अध्यक्षमा चयन गर्दै अखिल नेपाल महिला सङ्घ ढोरपाटन नगर समितिको तेस्रो भेला सम्पन्न भएको छ ।
प्रमुख अतिथि राष्ट्रिय जनमोर्चाका केन्द्रीय सदस्य गौरीश्वर पाण्डेको उद्घाटनसँगै २०८३ कात्तिक १९ गते बिहीबार सो कार्यक्रम सम्पन्न भएको हो ।
भेलाको उद्घाटनपछि मन्तव्य राख्दै पाण्डेले सत्तारूढ राजनीतिक पार्टीहरू भ्रष्टाचारको चङ्गुलमा फसेको आरोप लगाउनुभयो ।
‘सत्ता र शक्तिको आडमा शासन टिकिरहेको छ’ उहाँले भन्नुभयो– ‘यसले गर्दा सहकारी ठगी मौलाएको छ । गरिबदुखी जनता महँगीको चपेटामा परिरहेका छन् ।’
साम्राज्यवादी मुलुक अमेरिकाले एमसिसी पास गर्न लगाई कार्यान्वयनमा रहेकोे अहिलेको अवस्था नेपाल राष्ट्रका लागि घातक साबित भइरहेको उहाँको भनाइ थियो ।
‘हाम्रो पार्टी जनमोर्चाले स्पष्ट रूपमा भनेको कुरा कसैले पत्याएनन् । अहिले अमेरिकी साम्राज्यवादले चीनको विरुद्ध लड्न शासनसत्ता र शक्ति सरकार सम्हालिरहेका राजनीतिक पार्टीहरूलाई नै उपयोग गरिरहेका छन्’ उहाँ भन्नुभयो ।
विगतमा विभिन्न राजनीतिक पार्टीले सरकार सञ्चालन गरे पनि कैयौँ काम गलत भएका कारण विषम परिस्थिति सिर्जना भएको उहाँको भनाइ थियो ।
शासनसत्ताका गलत कामकै कारण राष्ट्रका महत्त्वपूर्ण संरचना र सम्पत्ति तहसनहस भएको पनि उहाँले औल्याउनुभयो ।
महिला आन्दोेलनको सन्दर्भ अगाडि सार्दै उहाँले हिजो नेपाल राष्ट्र बचाउन महिलाले आफ्ना बच्चालाई काखीमा च्यापेर अङ्ग्रेजका विरुद्ध जीवन बलिदान गरेको इतिहास स्मरण गर्नुभयो ।
राजमो नेता पाण्डेले भन्नुभयो– ‘महिलाले आफ्नो हकअधिकार र देशका लागि एकताबद्ध भई सशक्त ढङ्गले अगाडि बढ्न सक्नुपर्छ ।’
भेलालाई शुभकामना दिँदै उहाँले महिला सङ्घले आफ्ना हकअधिकारका साथै देश र नेपाली जनताको पक्षमा पनि महत्त्वपूर्ण भूमिका खेल्ने गरेकोमा यो यात्रालाई अझ सशक्त ढङ्गले अगाडि बढाउनुपर्ने आवश्यकतामा जोड दिनुभयो ।
अध्यक्षमा पौडेल
भेलाले स्नेहा पौडेल अध्यक्ष रहनुभएको १५ पूर्ण र पाँच सल्लाहकार रहेको २० सदस्यीय महिला सङ्घको ढोरपाटन नगर समिति गठन गरेको छ ।
समितिको उपाध्यक्षमा निमकुमारी भण्डारी, कोषाध्यक्षमा गौमती भण्डारी, सचिवमा ददिकला पाण्डे र सहसचिवमा पवित्राकुमारी छन्त्याल रहनुभएको छ ।
त्यस्तै सदस्यमा सुनमाया क्षेत्री, मीना बुढा, सन्जिला कुँवर, मीना पुन, गुमकुमारी पौडेल, हिमा कायत, गङ्गा अदै, जमुना खनाल, मनकुमारी विक र कमला पाण्डे चयन हुनुभएको छ ।
भेलाले धनकुमारी कुँवर, खिमकुमारी खरेल, देवीकुमारी श्रेष्ठ, तालकुमारी महत र गोमला भण्डारीलाई सल्लाहकारमा चयन गरेको छ ।
भेलालाई राजमो बागलुङका कोषाध्यक्ष दीपक थापा, अखिल नेपाल शिक्षक सङ्घ बागलुङका उपाध्यक्ष दुर्गाबहादुर भण्डारीलगायतले शुभकामना मन्तव्य दिनुुभएको थियो ।
भेलाको अध्यक्षता धनकुमारी कुँवरले, स्वागत निमकुमारी भण्डारीले र सञ्चालन ददिकला पाण्डेले गर्नुभएको थियो ।
