काठमाडौँ । नेपाली कम्युनिस्ट पार्टी (नेकपा) र उमा भुजेल नेतृत्वको नेपाल कम्युनिस्ट पार्टीबीच १० बुँदे सहमतिसहित पार्टी एकता भएको छ ।

सहमतिअनुसार एकीकृत पार्टीको नाम नेपाली कम्युनिस्ट पार्टी र चुनाव चिह्न पाँच कुने तारा रहनेछ । पार्टीको मार्गनिर्देशक सिद्धान्त मार्क्सवाद–लेनिनवाद तथा कार्यक्रम नेपाली विशेषताको वैज्ञानिक समाजवाद हुने तय भएको छ ।

एकतापछि सङ्घीय लोकतान्त्रिक गणतन्त्रको रक्षा, राष्ट्रिय स्वाधीनता, सुशासन, सामाजिक न्याय र आर्थिक समृद्धिलाई प्राथमिकतामा राखिनेछ । पार्टीको आन्दोलन मूलतः शान्तिपूर्ण हुने तथा सडक, संसद् र सरकारलाई आन्दोलनका मोर्चाका रूपमा उपयोग गरिने सहमतिमा उल्लेख छ ।

सबै तहका पार्टी समिति तथा जनसङ्गठनको समायोजन मंसिर मसान्तभित्र सम्पन्न गर्ने र एकता राष्ट्रिय महाधिवेशन आगामी स्थानीय तहको निर्वाचनपछि आयोजना गर्ने निर्णय भएको छ ।

सहमति पत्रमा नेपाल कम्युनिस्ट पार्टीकी महासचिव उमा भुजेल तथा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालले हस्ताक्षर गरेका छन् ।